بالمستندات.. ننشر النص الكامل لأقوال الفنانة جيهان الشماشرجي في النيابة بتهمة السرقة بالإكراه| خاص
حصل "الرئيس نيوز" على نص التحقيقات التي أجرتها نيابة قصر النيل الجزئية، التابعة لنيابة وسط القاهرة الكلية، مع الفنانة جيهان الشماشرجي، على خلفية قرار النيابة العامة بضبطها وإحضارها في واقعة اتهامها وآخرين بالسرقة بالإكراه.
ووفقًا للمحضر المحرر بتاريخ 29 يناير 2026، قامت قوة من مباحث قسم قصر النيل، بالتنسيق مع مديرية أمن الجيزة، باستهداف محل إقامة الفنانة بمدينة 6 أكتوبر، وأفاد المحضر بأن المتهمة امتثلت لقرار النيابة فور إخطارها بطبيعة المأمورية، حيث تم اصطحابها إلى ديوان القسم لاتخاذ الإجراءات القانونية.
وواجهت النيابة العامة الفنانة جيهان الشماشرجي باتهام مباشر، وجاء نص التحقيقات كالتالي:
س: ما قولك فيما هو منسوب إليك من كونك متهمة وآخرين بسرقة المنقولات المبينة وصفًا وقيمة بالأوراق والمملوكة للمجني عليها: مي حسام طه عبد العزيز، وكان ذلك بطريق الإكراه الواقع على المجني عليها أميمة محمد محمد الشيخ، بأن توجهتم صوب مسرح جريمتكم مستقلين السيارة رقم (ف ن 1527) وقمتم بالاستيلاء على المنقولات سالفة البيان، وحال ذود المجني عليها أميمة محمد محمد الشيخ عن المنقولات قام قائد السيارة بصدمها فأحدثتم إصاباتها الموصوفة بالتقرير الطبي المرفق، وتمكنتم بتلك الوسيلة القسرية من شل مقاومتها والاستيلاء على المنقولات، حال تواجدك على مسرح الواقعة للشد من أزره، وذلك على النحو المبين بالتحقيقات؟
ج: الكلام ده محصلش وأنا مليش أي دعوة بالموضوع ده.
س: حددي لنا صلتك وعلاقتك بالمجني عليهم كلٌّ من أميمة محمد محمد الشيخ، ونجلتيها مي حسام طه عبد العزيز وأميرة حسام طه عبد العزيز؟
ج: أنا كنت أعرف مي حسام من سنة 2011 تقريبًا، قابلتها مرة لما كانت شغالة في شركة بتمول مشروعات صغيرة، وأنا رحت الشركة دي علشان أعرف الأنظمة عندهم وإيه المشروعات اللي بيمولوها. اتكلمنا هناك، وبعدها عملنا لبعض إضافة على فيسبوك.
وبعد فترة كنت بدور على شقة في جاردن سيتي علشان أبدأ فيها مشروعي لتصنيع الإكسسوارات، وكنت عايزة حد يشاركني الإيجار لأن الشقة كانت فيها أكتر من أوضة وتنفع مكتب، فكتبت بوست على فيسبوك إني محتاجة حد يشاركني المكان.
ساعتها مي حسام بعتتلي، واتقابلنا وجت شافت الشقة اللي كانت في 10 شارع القصر العيني، وعجبتها وقالتلي إنها هتدخل معايا، وبالفعل استأجرنا الشقة وكتبنا عقد الإيجار مع الأستاذ حسين باسمي أنا ومي حسام.
أما أميرة حسام فتعرفت عليها سنة 2017 عن طريق أختها مي حسام، وفي سنة 2018 شفتها في كامب اسمه "الرحلة" خاص بالتنمية المستدامة، وكانت بتدي فيه ورشة عمل.
وأميمة محمد الشيخ دي تبقى والدة مي حسام، وكانت أحيانًا بتيجي تزور بنتيها في الشقة.
س: وهل توجد أي خلافات سابقة فيما بينك وبين المجني عليهم سالفي الذكر؟
ج: لا خالص، مفيش أي خلافات، وعلاقتنا كانت كويسة.
س: وماذا بشأن طبيعة علاقتك وصلتك بالمتهمين كلٌّ من:
1- مي محمود أبو طالب
2- محروس حمادة رياض حميدة
3- مصطفى ممدوح رياض حميدة؟
ج: مي أبو طالب من دائرة معارفي، وأنا أعرفها من سنة 2017 من أيام ما فتحت مشروعي، وكنا مستأجرين الشقة في جاردن سيتي أنا ومي حسام، وكانت مي أبو طالب شريكتها في مشروع الملابس.
ومي أبو طالب دلوقتي بقى عندها جاليري في غرب سوميد في أكتوبر، ولسه بتعامل معاها علشان تعمل فساتين لي.
أما محروس حمادة رياض حميدة ومصطفى ممدوح رياض حميدة فأنا معرفش حد فيهم ومش عارفة هما مين.
س: وما هي طبيعة المشروع الخاص بك تحديدًا؟
ج: كنت بصنع إكسسوارات وحُلي.
س: وماذا عن توقيت بدء ذلك النشاط؟
ج: كانت سنة 2017.
س: وما هو عنوان المكان الذي قررتِ به آنذاك بدء مشروعك؟
ج: أنا دورت على شقة في جاردن سيتي، ولقيت شقة في 80 شارع القصر العيني، ومي حسام ساعتها أجرت معايا الشقة دي.
س: وما هي كيفية مشاركة المدعوة مي حسام لكِ في استئجار تلك العين؟
ج: أنا ساعتها كتبت بوست على فيسبوك إني عايزة حد يشاركني الإيجار في الشقة، ومي حسام كلمتني لأنها، زي ما قلت، كانت عندي على فيسبوك، ونزلت ساعتها فرجتها على الشقة معايا وعجبتها، وقررت إنها تأجر معايا، وكتبنا عقد الإيجار أنا وهي.
س: وما هي طبيعة تلك العين وممَّ تتكون على وجه التحديد؟
ج: هي شقة رقم 8 في الدور الرابع، وهي مقر إداري وليس سكنيًا، وكانت عبارة عن خمس غرف.
أنا كان ليَّ غرفة واحدة، ومي حسام كان ليها ثلاث غرف، والغرفة الأخيرة كانت متأجرة قبل كده لواحد اسمه سمير، وكان فاتح فيها شغل له علاقة بالكمبيوتر والـ IT، لكن أنا مش عارفة بياناته كاملة.
س: ومن الذي يملك ذلك العقار تحديدًا؟
ج: أنا معرفش مين مالك العمارة، بس إحنا كنا بنتعامل مع وكيل مالك العمارة واسمه الأستاذ حسن تاج الدين يوسف.
س: ومتى تحديدًا قمتِ أنتِ ومي حسام باستئجار تلك العين؟
ج: سنة 2017، ساعة ما قررت إني هبدأ مشروعي.
س: وما هي المدة الإيجارية لتلك العين؟
ج: عملنا عقد ساعتها مع الأستاذ حسين تاج الدين مدته ثلاث سنين، بداية من سنة 2017 إلى سنة 2020، وبعد ما انتهى عملنا عقدًا جديدًا تاني لحد سنة 2023.
س: ومن كان المسؤول عن دفع القيمة الإيجارية؟
ج: إحنا كنا بنلم فلوس الإيجار مع بعض، واللي كان مسؤول عن دفعه مي حسام، بس أنا من شهر 9 سنة 2022 سبت المكان ومكنتش بروحه في الأول.
س: وما هو السبب وراء ذلك تحديدًا؟
ج: علشان كاريري في التمثيل بدأ يكبر، وعلشان كنت بصور معظم الوقت ومعدتش لاقية وقت أروح هناك، وكمان الإيجار كان غالي، فحسّيت إن مفيش داعي إني أفضل مكملة في مكان مبروحهش بشكل يومي، ولذلك عملت ورشة في بيتي.
س: وهل انقطعت صلتك بتلك العين منذ ذلك التاريخ المار ذكره؟
ج: لا، علاقتي لم تنقطع بالمكان، واسمي كان لسه موجود في عقد الإيجار، وكان ليا حاجات جوه الشقة.
س: وما هي طبيعة المنقولات التي تركتيها بداخل العين كما ذكرتِ؟
ج: أنا كنت سايبة ترابيزتين في المكان: ترابيزة شغل، وترابيزة شاي صغيرة كده تانية.
س: وما هو سبب تركك لتلك المنقولات بداخل العين؟
ج: علشان أنا كنت محتاجة أفضيلها مكان في بيتي الأول.
س: وما قولك فيما هو ثابت بالأوراق من وجود محادثة عبر تطبيق واتساب مؤرخة في 10 / 9 / 2022 جمعت بينك وبين مي حسام، وأخبرتيها خلالها بأنك قمتِ بنقل بعض منقولاتك من داخل العين بذات التاريخ، وأنك في اليوم التالي ستنقلين بقية منقولاتك، وعبّرتِ لها عن ضيقك بشأن تركك العين؟ (عرضناه عليها)
ج: أنا فعلًا كنت سبت المكان، بس كان في بعض الحاجات بتاعتي لسه جوه الشقة، وكنت بروح آخدها على فترات متقطعة.
س: وما هو السبب وراء ذهابك المتكرر للعين من حين لآخر؟
ج: أنا كنت بروح علشان كنت بحب المكان ده وبحسه زي بيتي، لأني كنت بشتغل فيه كل يوم من سنة 2017، وكمان علشان كنت بزور مي حسام ومي أبو طالب.
س: حسبما قررتِ من كونك لم تنقطع صلتك بالعين، وكذا قيامك بنقل كافة منقولاتك من داخلها، أكانت ما زالت بحوزتك المفاتيح الخاصة بتلك العين؟
ج: أيوه، كانت لسه معايا، وأنا زي ما قلت كنت لسه بروح المكان على فترات متقطعة.
س: وهل أبلغتِ المدعوة مي أبو طالب آنذاك بطبيعة ما لها من منقولات بداخل تلك العين؟
ج: لا، كل اللي قالته إن الحاجات دي من جوه وعايزة تاخدهم.
س: ألم تستفسري منها آنذاك عن سبب رغبتها في أخذ بعض المنقولات من داخل تلك الشركة رغم علمك بوجود شراكة فيما بينهما؟
ج: هي قالتلي إن في مشاكل حاصلة ما بينهم، لكن أنا ساعتها مدخلتش ومعرفتش إيه المشاكل اللي ما بينهم.
س: وما هي طبيعة الاتفاق الذي أُبرم تليفونيًا فيما بينكما آنذاك؟
ج: هو كل اللي اتفقنا عليه إننا هنروح سوا، وكل واحد فينا ياخد حاجته من جوه لا أكثر ولا أقل.
س: وهل أبلغتكِ آنذاك بأنها ستحضر إلى العين وبرفقتها أي أشخاص آخرين أو أي سيارات لنقل المنقولات من داخل العين؟
ج: لا، هي ما قالتش حاجة زي كده.
س: ومن الذي رافقكِ حين توجهك للعين محل الواقعة آنذاك؟
ج: أنا رحت لوحدي ساعتها، وأول ما وصلت ركنت العربية تحت العمارة.
س: وما الذي أبصرته حال وصولك تحديدًا؟
ج: أول ما وصلت نزلت من العربية واتقابلت مع مي أبو طالب وجوز أختها يارا، واسمه محمود. كانوا واقفين جنب العمارة، وساعتها مي قالتلي إن محمود هيطلع معايا ياخد حاجتها وأنا هستنى في العربية. وكان في عربية كانت معاها، وأنا طلعت الشقة أنا ومحمود ده.
س: وما هي كامل بيانات الشخص الذي يُدعى محمود؟
ج: هو تقريبًا اسمه محمود أشرف، واللي أعرفه إنه جوز أخت مي أبو طالب اللي اسمها يارا، ومعرفش كامل بياناته.
س: وما الذي استتبع ذلك؟
ج: أنا طلعت الشقة ومعايا محمود ده، وفتحت الشقة بالمفتاح اللي كان معايا.
س: أكان يوجد أي أقفال موضوعة على باب تلك العين في تلك الأثناء؟
ج: لا خالص، وأنا فتحت بالمفتاح اللي كان معايا.
س: وما قولك فيما ثبت بمحضر استيفاء النيابة المؤرخ في 4 / 5 / 2024 من أنه بإجراء المعاينة على العين محل الشكوى تبين وجود كسر بسيط بباب العين من ناحية كالون الباب؟
ج: لا، أنا دخلت بالمفتاح اللي كان معايا.
س: أكان بحوزة المدعو محمود أشرف أي أدوات آنذاك واستخدمها في فتح باب العين؟
ج: لا، ما كانش معاه أي حاجة، وأنا فتحت الباب بالمفتاح اللي كان معايا.
وللمتابعة إلى النص الكامل للتحقيقات يرجى قراءة المستندات التالية:
