تامر أمين يطالب الحكومة بتفعيل نظام العمل من المنزل

طالب الإعلامي تامر أمين؛ الحكومة المصرية بالإسراع في دراسة مشروع قانون العمل من المنزل مشيرا إلى أن هذا الامر سوف يزيد من إنتاجية الموظف.

وقال أمين خلال برنامج "أخر النهار" المذاع على قناة "النهار": "يا حكومة فعلوا خاصية العمل من المنزل؛ دي خاصية دول العالم المحترمة بتتبناها بنسب وبأشكال حسب ظروفها؛ احنا أطلقنا الحملة دي في البرنامج لأني مقتنع أنها صح جدا على مستوى البيئة والإنتاجية والكفاءة والفاعلية في العمل وعلى مستوى المرور والزحام وقلة استهلاك البنزين والتخفيف في المرافق الحكومية والشركات وتوفير أجر الموظف أو العامل".

وأضاف: "دا بيكون في توفير كمان في أجر العامل كمان كأنك زودت مرتبة؛ لما تجيب الموظف اللي بياخد 10 ألاف جنيه في الشهر كل يوم بيصرف 3 ألاف مواصلات ولو وفرتهم للموظف كأنك زودت راتبه".

وتابع: "لو سمحتوا ادرسوا كيف يمكن تطبيق نظرية العمل من المنزل؛ كل الدراسات الخارجية والداخلية بتقول إن خصوصا موظفي الحكومة 60-70% منهم مش مطلوب تواجدهم في مكان العمل خالص؛ تخيل كدة لما 70% من موظفي الحكومة اللي هما 6.5 مليون؛ تخيل أن أربعة مليون بني أدم كل يوم الصبح مش هينزلوا دا الحكومة بس".

وواصل: "زود عليهم العمالة في القطاع الخاص كل شركة على الأقل ممكن 50% من العمالة تعمل من المنزل؛ هي ثقافة ملهاش علاقة بالأمضا والبصمة؛ أنتوا مضيتوا الناس كتير وبصمتوهم كتير؛ خدتوا منهم شغل كتير؟ لا خدتوا منهم هم كتير؛ مجهودك يبان في النتيجة أقعد في بيتك وأديني شغل صح".

وأكمل: "الحاجة اللي مش لطيفة عندي أن الحكومة المصرية بتدرس هذا الموضوع من 2018 من 2018 بتدرسي يا حكومة ليه اهدار هذا الوقت في أمور ممكن تخلص في أسبوعين تلاته؛ الحكومة فكرت في الموضوع سنة 2018 وقالك هندرسه ونقول النتائج ولكن يشاء السميع العليم أن ربنا يبعتلنا كورونا وغصب عنكم هتقعدوا في البيت".

واختتم: "في ناس اشتغلت أحسن في ظل الكورونا؛ ربنا بعت عشان يقولك أهو نموذج اجباري عشان تطبق عليه؛ مش لازم أروح شغلي عشان أطلع شغلي مش لازم اتبهدل عشان أطلع انتاج؛ العامل والموظف هيوفر فلوس الحكومة هتوفر فلوس والشركات والقطاع الخاص هيوفر فلوس؛ أرجو من الحكومة الإسراع في الانتهاء من دراسة مشروع قانون العمل من المنزل".