أحمد موسى يوجه رسالة للمفرج عنهم بقرارات عفو رئاسي: "متدعوش المظلومية"
وجه الإعلامي أحمد موسى للمفرج عنهم بموجب قرارات العفو الرئاسي مشيرا إلى أنهم لم يتعرضوا للظلم ولكنهم ارتكبوا جرائم تستحق العقوبة.
وقال موسى خلال برنامج "على مسؤوليتي" المذاع على قناة "صدى البلد": "حضراتكم عارفين سيادة الرئيس عبد الفتاح السيسي مشكورا كان بيطلع قرارات للافراج عن محكوم عليهم بيدي عفو ناس محبوسين بيخرجوا وكان الهدف أن الناس قضت عقوبة وبالتالي بتقول للناس اخرج عشان تعود مواطن صالح
وأضاف: "سمعت بعض الناس وتعليقات بعض الناس مش عجباني؛ حد يقولك كنا مظلومين لا أنت مكنتش مظلوم أوعى تقولها تاني محدش ظلمك؛ القضاء المصري مبيظلمش حد؛ القضاء المصري قضاء عادل؛ هو أنت نسيت أنت عملت ايه؟ أوعى تنسي أرجع إلى 2011 وأفكرك".
وتابع: "مش معني أنك خرجت أنك مرتكبتش جرائم؛ ارتكبت جرائم ولأنك ارتكبت جرائم صدر عليك حكم بسبب ارتكاب الجرائم محدث خدك حطك في السجن عشان معملتش حاجة لا طبعا؛ مش عشان رأيك غير حقيقي جرائم ارتكبت؛ هو انتوا ناسيين علاقتكم مع الاخوان؟ هو أنتوا ناسيين تحالفكم مع الاخوان والتنظيم الإرهابي؟ هو أنت عشان خرجت الفترة دي أو في دولة عايزة الناس تخرج وتعيش حياة كويسة وأنك خرجت فتقعد تشتم في البلد وتهاجم القضاء والدولة وتفتكر أنك كنت مظلوم؛ لم تكن مظلوم أبدا".
وواصل: "تشكر الدولة المصرية بتقولك خد فرصة عشان تعيش مواطن صالح ولكن لا تدعي المظلومية ولا تدعوا المظلومية مش عايز اسمع حد بيدعي المظلومية أو اسمع حد بيقول الناس اللي كانوا في السجن دول دخلوا السجن ظلم مدخلتش السجن ظلم أنت دخلتوا عشان أجرمتوا في حق الوطن".
وأوضح: "موقفي لا أغيره أبدا؛ في 2011 كان قريب أوي والصورة قدامنا ولكن لازم تعرفوا مش معني الافراج أو العفو أو خروجكم من السجون أنكم كنتم مظلومين كفاية النغمة دي".
واختتم: "أوعى الناس تفتكر أن هجومك على القضاء وأنك تسيء للدولة؛ لا طبعا لازم ندافع عن القضاء؛ مينفش بعض الناس يطلعوا يتكلموا ويقولك الناس اللي كانوا في السجن دول أبرياء؛ لو كان برئ كان خد حكم براءة طيب هو خد حكم والا اتسجن؛ مهما الناس تحاول غسل سمعتها الناس لا تنسي".
