أحمد بدير: "لو شفت أبو تريكة مش هسلم عليه"
نفى الفنان أحمد بدير ما تردد عن شائعات زواجه من احدى الفنانات في السر مشيرا إلى أن الشائعات عادة ما تخرج حين يعمل فنان مع فنانة لفترة في أكثر من عمل.
وقال بدير خلال برنامج "حبر سري" المذاع على قناة "القاهرة والناس": "في دخان من غير نار أيوة؛ اتسألت السؤال دة كتير وعادة لما الممثل يشتغل مع زميلة لفترة بتطلع نفس الشائعات؛ جوازي مع الفنانة هياتم شائعة أنا مش قدها كانت زميلة محترمة وعملنا مع بعض مسرح".
وأضاف: "مفيش فنان خالي من الاشاعات ومفيش انسان حتى عادي خالي من الاشاعات زي اشاعات الموت كدة الناس بتفرح في الشائعات".
وعن خلافه مع محمد أبو تريكه نجم الأهلي السابق قال بدير: "لو قابلته مش هقوله حاجة ولو داخل في مجموعة وهو في وسطهم هقول سلام عليكم ولكن مش هسلم عليه مخصوص؛ أنا أهلاوي على فكرة؛ أنا مهاجمتوش أنا قلت إني بحبه كلاعب وحضرت المنتخب لما فاز في 2006-2008-2010 ولكن بعد الاحداث الأخيرة واللي اتقال أي حد ميحبش تراب مصر حتى لو أخويا محبوش".
وتابع: "مزعلتش من الفنان محمد لطفي لما نشر شائعة وفاتي؛ لأن هو نقلها عن حد ودي مكانتش أول موتة دي اتكررت أكتر من مرة؛ في قلة مبتحبش أحمد بدير يعبر عن رأيه في قضايا بلدة أو السياسية فتطلع الاشاعة دي وقبل أي احتفالات زي احتفالات أكتوبر أو الثورة دايما بيموتوني".
وكشف بدير عن تعرضه لعملية نصب من أحد المنتجين؛ مشيرا إلى أنه لا يذكر اسمه مضيفا: "كان في مسلسل اسمه يا أنا ياجدو وكتبلنا شيكات بدون رصيد ومش أنا لوحدي بس دا وهو لحد دلوقت هربان لأن في أحكام صدرت عليه".
وواصل: "في عندي 415 عمل؛ ممكن راضي عن 45 عمل منهم والتانيين في أدوار ما بين الجيد والضعيف؛ ودا حلو أوي وكل واحد من الـ 45 عمل دول يساوي 50 عمل تانيين وبعدين الجميل أن هما مش في السكة اللي الناس حابيني فيها من الأول اللي هي الكوميديا ولكن في منوعات".
