أحمد موسى: "التجاوزات في الرياضة المصرية انتهت واللي جاي حاجة تانية"
أكد الإعلامي أحمد موسى، أن الفترة المقبلة سوف تشهد انضباطا كبيرا في الرياضة المصرية، مشيرا إلى تعيين لجنة الانضباط الجديدة والتي تضم عدد ممن القضاة.
وقال موسى خلال برنامج "على مسؤوليتي" المذاع على قناة "صدى البلد": "اللي فات حاجة واللي جاي حاجة تانية أسمعوا الكلام؛ من النهاردة اللي جاي مختلف تماما لا هتلاقوا رئيس نادي هيطلع يتطاول على حد ولا عضو مجلس إدارة هيتنمر على حد لا يجرؤ ولا حد في جهاز فني يتطاول أو يشتم هنا".
وأضاف: "كل الهيصة اللي حصلت الفترة الماضية واللي كانت تشويه للرياضة المصرية سوف تتوقف؛ اللجنة القضائية أنتوا متعرفوش المستشار عزت خميس ولا المستشار شيرين فهمي أنا اعرفه؛ القاضي لا هيسمح لحد يعلي صوته عليه ولا هيسمح لحد يقوله تعالي وميجيش ولا يسمح لحد يقوله كذا وكذا".
وتابع: "أنتوا فاكرين الجلسات طبعا وكنا بنعرضها هنا؛ كان بيقول لمرسي أقعد وفلان أقعد؛ اللجنة دي زي اللي قبلها واللي قبلها وهذه اللجنة قضاة كل واحد فيهم عنده تاريخ 40 سنة وناس محدش يقدر يقول حاجة وقامات كبيرة جدا في القضاء وناس مشهود ليهم بالنزاهة والعدالة".
وواصل: "النهاردة 11 فبراير 2023 ما قبلها شيء و12 فبراير 2023 شيء تاني لن تسمعوا أصوات هنا أو هنا واللي عنده حاجة يروح للجنة على برنامج على مواقع التواصل الاجتماعي روح للجنة واللجنة قدامك متسيبوش حد يشوه الرياضة المصرية تاني".
وأوضح: "أنا بقول للكل متسيبوش حد يشوه الرياضة المصرية تاني؛ في تاس راحت للقضاء وأنا واحد من اللي راحوا للقضاء عشان أخد حقي؛ نخلي بالنا لأن اللي حصل طال الجميع الكبير والصغير؛ كل واحد يخلي باله عشان صورتنا صورة البلد والإعلام والرياضة وصورة المسؤول كل واحد يمسك لسانه".
وذكر: "الوضع النهاردة مختلف ما كنا طول عمرنا والدنيا زي الفل، والنهاردة حصل كتير الفترة اللي فاتت عندنا النهاردة لجنة من قضاء مصر الأجلاء".
وأعلن مجلس إدارة الاتحاد المصري لكرة القدم، اليوم الأحد، اعتماد تشكيل لجنة الانضباط والقيم والأخلاق، برئاسة المستشار عزت سيد عبد العزيز خميس، مساعد وزير العدل السابق.
