النائب أحمد السنجيدي: يجب أن تتناسب المعاشات مع الحد الأدنى للأجور والقوة الشرائية للجنيه

أعلن النائب أحمد السنجيدي، عضو لجنة الخطة والموازنة بمجلس النواب: رفضه لتعديل قانون التأمينات الاجتماعية والمعاشات بشكله الحالي الذي كان معروضا أثناء الجلسة، مؤكدًا أنه مع تعديله دعما للمواطن.

قانون التأمينات والمعاشات 

وقال "السنجيدي" في تصريحات لـ الرئيس نيوز: «يعني أنا عايز في النهاية لما نيجي نعدل قانون يكون فيه وجاهة لتعديله، مش كل سنة هنروح نعدل قانون والناس في وادي وإحنا في وادي، والنهاردة لما الحكومة بتقر الحد الأدنى للمرتبات أو للأجور، مش بتقرها كده عشان هي بتحب تدي للناس فلوس، على قد ما بتقرها علشان دي الحياة اللي تحفظ للناس كرامتها، فهل المواطن وهو في الحكومة وأفنى عمره في إنه يقدم للبلد دي مجهوده وتعبه وسنين عمره، لما يطلع معاش ما ينطبقش عليه نفس الوضع اللي كان بينطبق عليه وهو موظف».

 وأكد النائب أن هناك فجوة بين الأجور والمعاشات، قائلًا: دي مشكلة كبيرة جدًا، النهارده واحد بياخد 12 أو 13 ألف، لما يطلع معاش ممكن ينزل لـ 3 أو أقل، وده ما يكفيش الالتزامات الأساسية لازم يكون فيه ربط حقيقي بين الأجر والمعاش، إحنا بنتكلم عن 11.5 مليون مواطن بشكل مباشر، ولو حسبنا التأثير غير المباشر هنوصل لحوالي 30 مليون، يعني تقريبا نص الشعب المصري ليه علاقة بالمعاشات، ولما تزود 600 أو 700 جنيه بس، ده مش هيعمل حاجة في ظل ارتفاع الأسعار، إحنا بنتكلم عن زيادات كبيرة في كل حاجة: أكل، شرب، خدمات.

المعاشات تمس 11.5 مليون مواطن بشكل مباشر

وتابع: “لما جيت اتكلمت في الجلسة العامة لمجلس النواب خلال مناقشة مشروع قانون التأمينات الاجتماعية والمعاشات، قلت إن إحنا عندنا المعاشات تمس 11.5 مليون مواطن بشكل مباشر، وفيه استفادة غير مباشرة، زي الست اللي قاعدة في بيتها وبتقبض معاش وممكن بتصرف على ابنها اللي لسه بيتعلم أو بنتها اللي لسه بتدرس، أو بنتها اللي اتطلقت وجاية عايشة معاها في بيتها وجوزها ما بيصرفش عليها.. يعني هترميها في الشارع؟ لأ طبعا، فهي بتصرف عليها، فلو المعاشات بتمس 11.5 مليون بشكل مباشر، فهي بتمس مثلهم ثلاث مرات بشكل غير مباشر، يعني بنتكلم في حوالي 30 مليون، يعني نص الشعب المصري له علاقة بالمعاشات”.

واستكمل عضو لجنة الخطة والموازنة: “أصحاب المعاشات ما قصروش في حق البلد في حاجة، الناس دي أول ناس بتقف جنب بلدها، دي طبيعة الشعب المصري، ممكن يكون عنده أوجاع وممكن ينتقد، لكن أول ما يحس إن البلد في خطر بيقف معاها، سواء بجيشه اللي هو أولاد الشعب أو بشرطته أو بكل ما يملك، لذلك  يجب أن تكون المعاشات متناسبة مع القيمة الشرائية للجنيه والحد الأدنى للأجور على الأقل، يعني ما ينفعش تقولي هزود المعاشات بحد أدنى 8% وحد أقصى 15%.. يعني إيه 15%؟ لما واحد معاشه 3000 أو 4000 جنيه تزود له 600 أو 700 جنيه؟ دول يعملوا إيه؟ ده اللحمة زادت كام مرة خلال 10 سنين، والحاجات الأساسية والبنزين والكهرباء والمية!!”.