الثلاثاء 03 أكتوبر 2023 الموافق 18 ربيع الأول 1445
رئيس التحرير
شيماء جلال
عاجل
أخبار

الباز يطالب بتدخل "غاشم" ضد التجار المتلاعبين في الأسعار

محمد الباز
محمد الباز

طالب الإعلامي محمد الباز؛ بتدخل حاسم ضد التجار المتلاعبين في الأسواق والذين يستهدفون تحقيق مكاسب في ظل الأزمة الحالية عن طريق إخفاء السلع لرفع أسعارها.

وقال الباز خلال برنامج "أخر النهار" المذاع على قناة "النهار": "مفيش كلام أي قعده في مصر ناس في المكاتب أو البيوت مفيش كلام إلا عن التجار واللي بيعملوه في الأسعار لدرجة أن ناس كانوا موجودين في سوبر ماركت شهير يوم الخميس وأول ما أعلن تحرير سعر الصرف طفوا النور وبدأوا يغيروا في سعر السلع".

وأضاف: "يقولك الدولار زاد؛ طيب وأنت مالك والدولار زاد البضاعة الموجودة في السوبر ماركت في اللحظة دي مالها ومال الدولار اللي زاد؟ وبعدين تسمع تبرير غريب جدا ويجي يقولك أصل التاجر لو باعلك بالسعر القديم مش هيبقي معاه فلوس يجيب بضاعة جديدة".

وتابع: "طيب مانت هتجيب البضاعة الجديدة وتبيعها للزبون بسعر أغلى؛ البضاعة قديمة عندك واشتريتها بالسعر القديم وتيجي تبيعي على أساس السعر الجديد".

وأوضح: "واحد من أصدقائي أبنه بياخد درس وقاله أنت عارف الأسعار والدولار زاد طيب هو ايه مستلزمات انتاج المدرس الخصوصي؟ المفروض لا يتم التسامح على الإطلاق في أي واحد يزود الأسعار والداخلية ضبطت قضايا كتير جدا وناس بتخبي البضاعة عشان تغلي سعرها".

وأكمل: "إنت بتكلم عن ناس بتتحكم في رز وسكر وسجاير ومواد بترولية وأدوية؛ إيه الفجر ده؟ لما يبقي في تاجر وبيتحكم في سلعة معينة عشان يغليها على الناس في ظل هذه الأزمة يجب أن يتم إعدامه في ميدان عام والناس مينفعش تتساب نهيبة للتجار".

وواصل: "لابد من التدخل وأنا دلوقت بتكلم عشان تقول الضمير مفيش؛ التاجر ده عنده ضمير منين؟ متتعاملش بهذا الشكل وتقول احنا نعول على ضمير التجار في هذه الفترة؛ من يثبت اللي بيعمل ده التصرف الواضح جدا لابد من التدخل الغاشم من الدولة ضد الناس اللي بترفع السلع".

واختتم: "لو الأمر بأيدي أن التاجر اللي يتمسك وهو بيخزن سلعة عشان يغلي سعرها أو بيستغل هذه الأزمة عشان يعمل مكاسب دا يتعدم في ميدان عام هتقولي الانسان وحقوق الانسان والاعدام وبتاع طيب الناس اللي أنت بتجوعها دي ملهمش حقوق؟ مش أنسان دول عشان يبقي ليه حقوق؟".