«رايحة بطوح وضغطي واطي».. سيدة تتهم طبيبة برفض الكشف عليها والتدخل في حياتها الشخصية: مش محجبة ليه
انتقدت الكاتبة آية عبد الرحمن تعرضها للتهكم من قبل طبيبة بسبب مظهرا الشخصي خلال ذهابها لإحدى عيادات الباطنة بعد تعرضها لوعكة صحية.
وعبر حسابها الرسمي على موقع التواصل الاجتماعي فيسبوك أوضحت آية عبد الرحمن: رحت أكشف عند دكتورة باطنة، دخلت فبتنقل اسمي من التذكرة وبتسألني عنه للتأكيد، فقلت لها آية عبد الرحمن، فرددت الاسم ورايا مستغربة، فأكدت لها الاسم تاني، فضلت باصة لي بدهشة غير عادية فسألتها: في مشكلة يا دكتور؟ لقيتها بتقوللي: آية عبد الرحمن؟ مسلمة يعني؟ أومال مش محجبة ليه؟.
سيدة تنتقد طبيبة نصحتها بارتداء الحجاب
وتابعت: قلت لها بعد إذنك يا دكتور مفيش داعي للتدخل في أمور شخصية، قالتلي لأ دي مش أمور شخصية، قلت لأ دي أمور شخصية، حضرتك مالكيش دعوة بخصوصياتي، قالتلي لأ دي مش أمور شخصية ده دين، والدين بيقول كذا، وقعدت ترغي كلام كتير ماكنتش فايقة له لأني رايحة بتطوح أصلا وضغطي واطي.
وذكرت: كررت لتالت مرة إني مش عايزة كلام في أمور شخصية، فقالت لي I am so sorry بس هقول كلمتين وبعدين أسكت، وبدأت محاضرة في الدين النصيحة وذكّر فإن الذكرى تنفع المؤمنين والقرآن بيقول.. رغي كتير مالوش أي داعي، في موقف مالوش أي علاقة بالمواعظ، ولهجتها وملامحها كمان اتغيرت كأني أنا اللي غلطت فيها.. خلصت كلام فقلت لها ينفع أرجّع الكشف لو سمحتي؟ قالتلي اتفضلي، وناولتني التذكرة وهي متضايقة ومكشرة كأنها عايزة ترميها في وشي.
سكرتير العيادة استنكر فعل الطبيبة بتدخلها في أمور الشخصية
وتابعت: حتى سكرتير العيادة استنكر فعل الطبيبة بتدخلها في أمور الشخصية وطلعت لسكرتير العيادات أرجع التذكرة، فاستغرب إني ما كشفتش، قلت له الدكتورة بتحاسبني أنا ليه مش محجبة، قاللي وهي مالها؟ قلت ماعرفش والله أنتم اسألوها هي مالها، وأنا هشوف في دار الحكمة هي مالها.
ولفتت: ده موقف واحد لدكتورة بتمارس سلطة أخلاقية على مرضاها، وبتفرض عليهم رؤيتها في الدين واختياراتها في الحياة، وهي بتعمل كده في عيادات تابعة لمستوصف يعني يفترض إن عليها رقابة، ومع واحدة قادرة ترد وتقول لها مالكيش دعوة ومن فضلك ما تتدخليش في خصوصياتي، وهي بتواصل التدخل بمنتهى قلة الذوق وعدم المراعاة للمكان ولا للظرف هي شايفة كويس إني تعبانة وبتكلم بالعافية، يا ترى الدكتورة دي في عيادتها الخاصة، أو في مستشفى حكومي لعلاج الغلابة، أو مع حد خجول ومش قادر يرد عليها، هتعمل ايه؟ طب لو المريضة مسيحية هتعاملها إزاي؟ طب لو دخل لها مريض عامل تاتوه مغطي دراعه، ولا مريضة لابسة مكشوف شوية، هتقول لهم إيه؟ ايه حدود الأذى النفسي اللي ممكن تسببه لشخص مش قادر يواجهها؟.
واختتمت منشورها بمطالبتها نقابة الأطباء بأن تجري تحقيقًا جادًا وحازمًا في هذه الواقعة، قائلة: عشمي يا نقابة الأطباء العامة في مصر، أنه عند تقديم شكوى رسمية إليكم، تُحققوا فيها بنزاهة، وتستوعبوا المهازل التي يتعرض لها المرضى فلا ندفن رؤوسنا في الرمال، ونسجن المشتكي، ونسيب المؤذي حر طليق.
