محسن جابر: مش عايز أعيش اليومين دول ونفسي اتكسرت
أكد المنتج محسن جابر، أنه قرر الابتعاد تمامًا على الوسط الفني بعد مسيرة حافلة بالإنتاجات الموسيقية، مشيرا إلى أنه لا يرغب في أن يعيش في ظل الأوضاع الحالية.
وقال جابر في مقابلة مع برنامج "حبر سري" المذاع على قناة "القاهرة والناس": "أصعب قرار بخده في حياتي الأيام دي هو أني مش عايز أعيش اليومين اللي أنا فيهم دول تعبت بجد وأنا بتحمل جامد جدا، وممكن أشيل حمل جبال بس محبيش أنهي حياتي بشكل درامي واللي بيحصل فيا دلوقتي أنا مش متقبله".
وأضاف: "شوية مشاكل بردو عشان التراث وبقول يد العدالة فوق الجميع وربنا فوق الجميع أصعب قرار ممكن أخده أني مكنتش عايز أتحط في الوقت ده، واللي بناء عليه قررت اطلع تماما خارج الوسط الفني والبرنامج ده ممكن يكون آخر برنامج ممكن أسجله في حياتي".
وتابع: "عدالة مصر فوق الجميع واثق جدا في قرار مصر لأنه نصرني على مدار عشرات القضايا وأنا عرف أني مخدتش خطوة خطأ ضد أي حد وعارف أن ربنا هيكرمني حتى لو كان في حاجة وأنا لم ارتكب خطأ على الإطلاق".
وواصل: "أنا عملت كل ما هو يخدم مصر من أول الخليج لحد المغرب، كل الأغاني اللي كانت بتذاع في كل الإذاعات كانت من صناعة العبد لله والشركات المصرية أنا الوحيد اللي حافظت عليها واشتريتها وخليتها على أرض مصر".
وذكر: "الصراع على تراث أم كلثوم، كانوا بيبعوا التراث ده لإحدى الشركات الخليجية وأنا تدخلت وحصل منافسة على القصة دي وأنا اشتريت ولم أرتكب جرم وأثق في العدالة جدا أنا مظلمتش حد ولم أعتدي على حد وأوراقي كلها سليمة عشان كده بقول نفسي اتكسرت".
