الإثنين 22 يوليه 2024 الموافق 16 محرم 1446
رئيس التحرير
شيماء جلال
عاجل
فن ومنوعات

مؤلف مسرحي: فكرة مسلسل "خالد نور وولده نور خالد" مسروقة مني

الرئيس نيوز

هاجم المؤلف المسرحي حاتم حسين، صناع مسلسل “خالد نور وولده نور خالد” واتهمهم بسرقة قصته منه.

وقال حسين، عبر منشور علي “فيس بوك”.: “طيب يا جماعة مسلسل خالد نور وولده نور خالد فكرته الأساسية (أب وابنه في نفس السن بيخوضوا رحلة) مسروقة من مسلسل كنت عامله وبعدها اتحول لفيلم”.

وأضاف: “المسلسل كفكرة طلع لأحمد أمين وأكرم حسني وبعت لأمين المعالجة ببريزنتيشن أحمد أمين بكل احترام قاللي رأيه وتخوفاته من الفكرة (ممكن أمين يشهد على ده) بعدها للأستاذ طارق الجنايني عجبته الفكرة وشاف نحولها لفيلم وفعلا اشتغلت على معالجة الفكرة وتحويلها لفيلم بعدها طارق الجنايني انشغل والموضوع نام (فيه إيميلات بالمعالجة مبعوتة)”.

وتابع: “المهم الفكرة فضلت موجودة لحد ما بدأت اشتغلها مع نجم كبير (مش هاقول اسمه) وفي وسط الشغل فوجئت ببوستر المسلسل.. من الاسم شكيت".

وأكمل: “كلمت شريكي في الكتابة أحمد رشدي عرفت إنه عرض الفكرة على نجم كوميدي (برضه مش هاقول اسمه) فعجبته جدا وتحمسلها وشاف أن أنسب واحد يعملها معاه هو كريم محمود عبد العزيز وفعلا قابل كريم وقاله الفكرة (كريم انبهر بالفكرة لكن ما أظهرش أي اهتمام على حسب رواية النجم اللي باثق في كلامه جدا)”.

وواصل: "كل ده كنت مش متأكد أنها نفس الفكرة.. كلمت مؤلف المسلسل صديقي قلتله عايز أسألك سؤال هل المسلسل بتاعك قصته إن هيكون أب وابنه في نفس السن بيعملوا رحلة ما (buddy comedy ) odd couple. قاللي آه.. سألته أنت اللي جايب الفكرة ولا نجم أو منتج قالولك إحنا معانا فكرة logline عايزين نشتغل عليه.. قاللي لا أنا اللي جايبها أنا واللي بيكتب معايا... فأنا صدقته”.

وزاد: “بس بعد كده هو قال للنجم ده أن شيكو هو اللي جاب الفكرة (وده عكس اللي قالهولي) وأنا عاذره لأنه ممكن يبقى مش عايز يلبس حد.. بس هي دي الحكاية.. هتقولولي مسجل هاقولكو آه الفكرة بس أن اللي بيحصل إنك بتحور الفكرة وتخلق مبررات تانية وشخصيات تانية بس بتبقى حرقت أكتر عنصر جذاب في الحكاية (أب وابنه في نفس السن بيخوضوا رحلة بين الماضي والحاضر)".

وأردف: "في الآخر هتبقى مش نفس الفكرة ويتقال أصلها اتعملت ميت مرة في أفلام كذا وكذا وتوارد خواطر وكل الكلام الجميل ده”.

واستطرد حسين: "أنا عامل البوست ده ليه..عشان لازم يبقى فيه طريقة تحفظ الحقوق والأفكار من سرقة الممثلين والمنتجين اللي بيعتبروا الفكرة يعني حاجة بسيطة.. وعشان إحنا كمؤلفين بنبيع أفكار وبعدين نكتبها لما نتفق عليها مش كل ما هتجيلي فكرة هكتبها فيلم ولا مسلسل قبل ما أعرضها على حد.. وتاني اللي بيسرق بيسرق سطر واحد ويعمله بطريقته وبيعتبر ده صياغة".

واختتم "أكيد متضايق شوية لأن الفكرة دي كنت بحبها جدا وكنت محضرلها حاجات حلوة وكنت هاعملها مع كوميديان كبير باحبه وبقالنا كتير عايزين نشتغل مع بعض.. ومتضايق لأنها مش أول مرة تحصل معايا.. ومستعد لمواجهة صناع العمل.. والفكرة موجودة منذ شهر أغسطس 2021.