الثلاثاء 21 مايو 2024 الموافق 13 ذو القعدة 1445
رئيس التحرير
شيماء جلال
عاجل
أخبار

عمرو أديب: "إحنا بنستورد موز ليه.. اتصرف له دولار إزاي؟"

الإعلامي عمرو أديب
الإعلامي عمرو أديب

طالب الإعلامي عمرو أديب الدولة بمنع استيراد السلع التي لها بدائل محلية مشيرا إلى أنه يجب تؤخذ الأمور بجدية من أجل عبور الازمة الحالية.

وقال أديب خلال برنامج "الحكاية" المذاع على قناة "أم بي سي مصر": "رئيس الوزراء راح بنفسه ووقف في جمرك الإسكندرية عشان يتابع السلع اللي بندخلها وهذا أمر هام جدا؛ التاجر بيستغل أنك مش لاقي غير كمية معينة وهو بيحط السعر اللي عايز يحطه ولكن لما السلع تدخل بكمية معينة يبقي في وفرة وتنافس في السوق".

وأضاف: "الدولة مهتمة جدا وكانوا بيتكلموا عن مليار و300 مليون ودلوقت بيكلموا عن 2 مليار والافراج بيكون على قد الأولويات الأشياء المهمة بالنسبالك؛ أنا مش مهتم أدخل سوبر ماركت الاقي بسكويت أو شيكولاته مستوردة اللي عايز الكلام ده يروح يجيبه هو ابقى سافر سفريتك اليونان أو إيطاليا هات شنطة فيها الحاجات بتاعتك".

وتابع: "اللي بيجرا انك عندك أزمة ومش قافل الحنفية كويس؛ طبعا في حاجة اسمها التهريب؛ وفي أماكن تدخل تسأل أنتوا دخلتوا السلع دي ازاي؟ وفي أدوية مش عارف تدخلها؛ أنت لغاية النهاردة بتجيب موز مستورد ليه؟ عندك الموز بتاعك بـ 15 جنيه الكيلو؛ الدولار ده ليه؟ اللي عايز ياكل موز من بلاد الموز يبقي يروح ياكله برة".

وواصل: "أخر مؤتمر بتاع منظمة التجارة العالمية كانوا بيناقشوا حاجة مهمة جدا اسمها الامن القومي للدولة أن أنت احتمال تاخد إجراءات عشان الأمن القومي للدولة؛ الموز ده هيفيدني في ايه؟ أنا عندي أولويات عندي قمح ودوا ومستلزمات انتاج ولبن أطفال وحاجات ليها علاقة بأشياء مكملة لصناعات واقفة". 

وأوضح: "دا دخل ليه واتصرفله دولار ازاي؟ هيقولك نفس الكلمة اللي بيقولوها دلوقت اصل دي برة موازنة الدولة؛ أصل دي برة؛ التهريب دة سايبينه ليه؟ اللي بيقبض هو اللي بيهرب والدولة مبتقبضش؛ أنت بتضرب الصناعة الوطنية؛ أنتوا عايزين نعدي والا نهدي؟ لو عايزين نهدي هنرجع تاني لنفس النقطة اللي ابتدينا منها".

وذكر: "كن جادا أنا مبقولكش احرم الناس من حته الجبنه البيضا؛ الناس تاكل جبنه بيضة ورومي ولانشون وموز وبرتقال وعنب طيب انت بتستورد عنب ليه؟ وتفاح ليه هتقولي أصل ده معمول للسياحة أنا بروح دول كتيرة اللي موجود دة انتاج بلدنا".

واختتم: "بروح تركيا العنب دة ايه تركي؛ التفاح دة أيه تركي؛ يقولك عايز توت بري ايه التوت البري دة وطعمة ميتبعلش؛ شوية عقل".