تامر أمين يعلق على الفيتو الأمريكي ضد وقف إطلاق النار: "فجر سياسي"
علق الإعلامي تامر أمين؛ على استخدام الولايات المتحدة لحق النقد "الفيتو" في مجلس الامن لإحباط تمرير مشروع قانون يدعو لوقف إطلاق النار في قطاع غزة.
وقال أمين خلال برنامج "أخر النهار" المذاع على قناة "النهار": "أمريكا صدمتنا ووجعتنا وعمل كل حاجة غلط عندنا أظهرت فيتو جديد في وجه مشروع قرار من أجل وقف إطلاق النار في غزة".
وأضاف: "أحنا برة اللعبة لما يكون في صراع بين القوي الكبرى دا صراع الديناصورات احنا ملناش فيه؛ الفيتو بيحميهم من بعضهم؛ الفيتو اخترع عشان يحموا بعضهم من بعضهم ولكن صغار العالم برة اللعبة وللأسف احنا مكويين بنار الفيتو".
وتابع: "وعشان ارجع الأمور لأصولها؛ الأمم المتحدة اتعملت بعد الحرب العالمية التانية وقتها الدول المنتصرة قررت تعمل حاجة اسمها عصبة الأمم وبعد كدة تحولت إلى الأمم المتحدة وقالت احنا مش هينفع نبقى أمم زي بعض وقالك نعمل مجلس أمن ويبقى أهم كيان في الأمم المتحدة هو اللي يقدر ياخد قرارات وينفذها".
وواصل: "الجمعية العامة تاخد قرارات ومتنفذهاش؛ الوحيد في الأمم المتحدة سيد قراره هو مجلس الامن غير كدة ميلزمناش وفي مجلس الامن في 5 دول دائمة العضوية ودول الأساس تتقلب الدنيا الناس تظلع أو تنزل مش قضيتنا".
وأوضح: "العشرة غير الدائمين في المجلس أهلا وسهلا لكن الكلام عند الخمسة الأعضاء الدائمين والنهاردة مجلس الامن المفروض أقولكم لو في ديموقراطية في العالم مفروض أقول إن مجلس الامن وافق على مشروع القرار لأن في 15 دولة صوتت 13 منهم وافقوا على القرار ودولة امتنعت عن التصويت هي بريطانيا ودولة واحدة استخدمت حق الفيتو".
وأكمل: "شوفتوا الغرب الديموقراطي؛ تصويت يشترك فيه 15 طرف 13 دولة وافقت ودولة واحدة قالت لا فيبقى لا مادام معايا الفيتو فانا معايا صك الجنة أول لا يبقى هي لا شوفتوا الفجر السياسي واصل لحد فين".
واختتم: "أمريكا قالت لا خلوهم يخلصوا؛ أنا مش هقدر أكسر كلمتي مع نتنياهو؛ وقت ما تقول إسرائيل أنا خلصت وعملت سياسة الأرض المحروقة وقتها قولولي وأنا أطلع مشروع قرار بوقف اطلاق النار؛ إسرائيل واخدة تفويض من أمريكا افعلي ما تفعلين وإسرائيل مقصرتش عاملة اللي عليها وزيادة".
