عمرو أديب: "التعويم مطروح على الطرابيزة"
أكد الإعلامي عمرو أديب؛ أن تعويم الجنيه المصري في الوقت الحالي لن يتسبب سوى في زيادة الأسعار بشكل كبير.
وقل أديب خلال برنامج "الحكاية" المذاع على قناة "أم بي سي مصر": "لقيت ناس كتير بتتكلم في الموضوع دة من باب المؤامرة واتجمعوا كلهم مرة واحدة".
وأضاف: "لو أنتوا ناويين تسيبوا المشكلة وتجرورا ورا المؤامرة يبقي الله يرحمنا؛ الحقيقة فعلا ان في مشكلة وأن في تضخم وأن التعويم مطروح على الطرابيزة؛ والحقيقة أن صندوق النقد أجل كذا مرة أنه يقعد معاك عشان انت ميتعملش اللي هو عايزه".
وتابع: "ارجوكم تفرغوا للمشكلة؛ هي المشكلة صعبة؟ أيوة هي المشكلة هتأثر علينا؟ أيوة؛ التعويم الان مش هو دة الحل ولو هتفكر أن حل المشكلة التعويم أنت هترفع الأسعار وخلاص؛ قد يتم دفعك إلى التعويم؛ إنما الموضوع منظومة أنت لازم تعمل أشياء كثيرة؛ أنت لازم تلحق تبيع الأصول؛ محدش هيديك حاجة انت لازم تتصرف؛ الرئيس عبد الفتاح السيسي قال كده".
وواصل: "أنت لازم توفر كمية دولارات تقدر تسندك في التعويمات لو دة مش موجود التعويم هيبقي مضر وبس؛ الناس بتتكلم وتستدعي التعويم وخلاص؛ في ناس طبعا ودول أساتذة كبار تريد التعويم عشان يطربقها على دماغك ويتكلم بشكل اقتصادي كدة ولكن هو في واقع الامر عايز يطربقها على دماغك".
وأكمل: "التعويم معناه قول أرقام بقي؛ الرقم الموجود دلوقت زود عليه 30-40%؛ أنا بتكلم عن الناس المرشحين لو عندكم حلول تانية ممكن تقولوها؛ حد كان بيقول لو سمحت بيع الحاجات الخسرانة طيب أنا هشتري حاجة خسرانة ليه؟".
وأوضح: "أنا هاخد الخسرانة أعمل بيها ايه؟ إذا كنت أنت معرفتش تصلحها؛ أنا مش شايف حل غير أنك تسارع للبيع ولو حد عنده فكره تانية؛ ناس بتقولك ما نطور الصناعة؟ الناس عايزة الفلوس بكرة وواقفة على الباب".
وذكر: "اللي انتوا بتقولوه دة وهم؛ أنت معندكش حل ناجع واضح غير لما تيجي تعمل التعويم تكون جاهز؛ الست رئيس صندوق النقد الدولي بتقول لازم تعمل تعويم؛ لازم نتحرك ياجماعة اللي عنده فكرة يقولها".
واختتم: "ياجماعة هتعملوا ايه؟ أنا كل ما أسمع حد مفيش حد عنده حاجة؛ هو الموضوع سهل؟ لا الموضوع هياخد وقت؟ نعم".
