عمرو أديب: "النور بقى يقطع ساعتين.. قولولنا أيه الحكاية؟"
طالب الإعلامي عمرو أديب؛ الحكومة بكشف حقيقة زيادة فترة انقطاع الكهرباء لمدة تزيد عن ساعتين يوميا على عكس المحدد في السابق.
وقال أديب خلال برنامج "الحكاية" المذاع على قناة "أم بي سي مصر": "قالولنا قدامكم لغاية 15 سبتمبر بالكتير وكان المفروض سبتمبر جانا وفرحنا به وخلاص ودلوقت احنا ملاحظين حاجة في التلات أربع أيام اللي فاتوا النور مبيتقطعش في المواعيد اللي قالوا عليها والأهم أنه مبقاش بيقطع ساعتين مش ساعة".
وأضاف: "النور بيتقطع دولوقت ساعتين في عز الحر؛ أنا عايز حد يقولنا ايه الحكاية وايه الموضوع؟ هل انقطاع الكهربا مستمر يعني هو ملوش علاقة بارتفاع درجة الحرارة أو يا جماعة قولولنا الحقيقة لسة الموضوع متحلش وقدامكم شهر كمان".
وتابع: "احنا داخلين على مدارس والناس تعرف أن النور ممكن يقطع في أي وقت؛ أنا مبطلبش حاجة وعلى فكرة الناس اللي بتهبد ملناش دعوة بيها؛ أنا قدامي أن النور بيقطع ساعتين وبقي أي وقت".
وواصل: "هل في مشكلة؟ مش عيب مش أباحة قولولنا يا جماعة أن النور مش هيرجع تاني زي ما كان؛ النور هيفضل يقطع شوية؛ ماهو ياجماعة يعني ايه أزمة؟ بيبقي ليها ظواهر ونحن نعلم أننا في أزمة اقتصادية".
وأوضح: "الازمة الاقتصادية لها أثار جانبية؛ احنا معندناش حاجة فنية ولكن مفيش مازوت؛ زي ما يكون عندك عربية رولز رويس بس معندكش بنزين؛ أنت مثلا تقولي أنا مثلا أشيل 100 كيلو ولكن تقولي لا النور مبيقطعش لا هو بيقطع".
وذكر: "احنا كلمنا وزارة الكهربا وقالولنا لا هو مجلس الوزراء بس اللي هيتكلم؛ ولو سمحت يامجلس الوزراء قولنا بكل صراحة احنا مش هنرجع النور دلوقت لأن المعاد اللي تعهدت بيه الأمور أصبحت أسوأ أو تقولي مثلا أخر سبتمبر؛ زي ما اتقال أول مرة يوم الأربع الجاي وبعدين اتقال نص سبتمبر وأنا بقول لحضراتكم أن هذا الأمر مستمر ولن ينتهي خلال الأيام اللي جاية؛ وللأسف الجو لسة بايخ؛ النور مش بس مؤثر على الكهربا والتكييف ولكن مؤثر على المدارس والأسانسيرات والتلاجات".
واختتم: "على فكرة الشعب دة جدع أوي ولكن قولي إن في مشكلة؛ المعاد عدي وعدد الساعات زادت ويقولون ودي بقي اشاعات؛ أن احتمال يكون النور مفروض يقطع ساعة أو ساعة وربع وفي ناس في وزارة الكهربا مبترجعوش في معاده ولكن دي أشاعات".
