عمرو أديب عن منتقدي مرشحي الرئاسة: "متكسروش المجاديف وأدوا الناس فرصة"

طالب الإعلامي عمرو أديب؛ بالاستماع لكافة الأراء وعدم احباط المترشحين لانتخابات رئاسة الجمهورية ومنح الفرصة للجميع من أجل ابداء رأيه.

وقال أديب خلال برنامج "الحكاية" المذاع على قناة "أم بي سي مصر": "أنا من أربع خمس شهور قلت إن المرحلة الجاية هتشوفوا أسماء مكانتش موجودة؛ الكل يعود الان إلى الساحة؛ اللي متابع هتلاقي اعلاميين وسياسين ورجال أعمال رجعوا للساحة".

وأضاف: "لم يكن توقعا مبني على تنبؤات ولكن مبني على الحالة السياسية اللي احنا فيها وكل واحد عنده هدف جاي يحققه؛ واحد عايز يبقي عنده فرصة سياسية أو اقتصادية؛ الفترة الجاية الساحة السياسية عاملة زي الفيشار بتقطق جامد".

وتابع: "أنا قلت فجأة هتلاقي الساحة فيها ناس كتيرة؛ أنا لا أبغى إلا الإصلاح البلد دي عندها ازمة اقتصادية؛ البلد دي محتاجة تطور سياسي؛ احنا محتاجين حرية والقدرة على التعبير واحنا محتاجين نغير قوانين وكل دة فرصة في الفترة اللي جاية دي نقدر نغير وتقدر نصلح".

وأكمل: "أنت دلوقت مستقر كدولة وتستطيع الان تنتقل للمرحلة القادمة؛ النهاردة التيار الحر موجود والحركة المدنية موجودة؛ أرجو بس عدم تكسير المجاديف أدوا فرصة للناس تتكلم وتعبر؛ مش هيبقي أنه كان عندنا ظروف منعانا تعبر ولما الناس تطلع تعبر تقوله متعبرش؛ دع 100 ألف مرشح يترشح؛ خدوا الألوان كلها".

وأوضح: "جايز مرة واحد يتكلم وتقولوا نقف وراه؛ أنت عندك من 4-5 سنوات جايين فيهم فجوة دولارية سنوية من 15-20 مليار دولار طيب هتعمل ايه؛ أرجوكم لا تقللوا من قيمة الشعب؛ لما تكلم يقولك الشعب القائد والمعلم ولما تجيب الشعب القائد والمعلم تقوله هو الشعب دة يعرف حاجة".

وواصل: "ارجوكم خلوا الهوا يدخل ونتنفس ونتكلم ونتناقش وايه معاك ودورنا كإعلام وافتح الورق على الطربيزة واحنا مؤهلين لده والله".

وأعلن عدد من السياسيين ترشحهم لانتخابات رئاسة الجمهورية المقبلة من بينهم عبد السند يمامة رئيس حزب الوفد وأحمد الفضالي رئيس تيار الاستقلال.

ومن المقرر أن تقام انتخابات رئاسة الجمهورية في أوائل العام المقبل حيث تنتهي مدة ولاية الرئيس عبد الفتاح السيسي.