مصطفى بكري يعلق على تصريحات مديرة صندوق النقد عن مصر: "شكر الله سعيكم"

علق الإعلامي مصطفى بكري؛ على تصريحات مديرة صندوق النقد الدولي، والتي أشارت فيها إلى أن مصر قد تحتاج إلى إبطاء وتيرة الإصلاحات الاقتصادية.

وقال بكري خلال برنامج "حقائق وأسرار" المذاع على قناة "صدى البلد": "السيدة مديرة صندوق النقد الدولي قالت إنها على ثقة بالنتائج الجيدة اللي تمت في مراجعة الإصلاحات الاقتصادية في سبتمبر اللي جاي وقالت إن مصر قد تحتاج لإجراء الإصلاحات بوتيرة ابطأ مما كان يتصور سابقا لتجنب الاضرار باستقرار الاقتصاد الكلي".

وأضاف: "أخيرا نطقتي واتكلمتي؛ أخيرا بتقولوا مانتوا شغالين على الحكومية ليل ونهار؛ ارفعوا الكهربا وأرفعوا الغاز أخيرا عرفتوا أن دة هيأثر على الاقتصاد الكلي وحياة الناس؛ سرعة الإجراءات عملت لينا مشكلة كبيرة جدا في هذا الامر ولكن دة معناه أن صندوق النقد أخيرا وصل لفهم أعمق للوضع في مصر وبالتالي هيتم تخفيف الشروط اللي بيفرضها صندوق النقد الدولي على مصر".

وتابع: "عشان كدة من المحتمل أن تشهد الفترة الجاية استقرار لسعر صرف الجنيه مقابل العملات الأخرى ودا هيكون ليه أثر جيد على استقرار السلع؛ الحكومة المصرية سبق وخفضت قيمة الجنيه 3 مرات عشان توصل لاتفاق مع صندوق النقد ولكن التخفيض دة دفع للتضخم واحنا محتاجين بالفعل ولازم ننظر لتوصية الصندوق بنظرة موضوعية لأن الناس تعبت والاسعار بقت صعبة والجنيه بينزل".

وأوضح: "احنا محتاجين مرعاة البعد الاجتماعي في ان أحنا نفرمل ونبطأ وتيرة الإصلاحات اللي صندوق النقد عايز يدخلنا في نفق مظلم منطلعش منه الكلام دة مينفعش ولما تيجي السيدة مديرة الصندوق تقول احنا بنراجع الموقف ونخفف من وتيرة السرعة احنا بنقولها شكر الله سعيكم؛ أخيرا ما نتوا لو بتبصوا على الجانب الاجتماعي مكنتوش تضغطوا على الدولة والحكومة".

واختتم: "براحة على الشعب المصري وبراحة على مصر؛ احنا يهمنا أمن البلد دي واستقرار البلد دي؛ لازم يا صندوق يا نكد يا صندوق النكد الدولي لازم تراعوا البعد الاجتماعي وتكفوا عن الضغوط اللي بتمارس على الحكومة؛ صحيح القيادة السياسية بتحاول تخفف من عبء الإصلاحات الصعبة والشروط المجحفة اللي بيعملها صندوق النقد الدولي ولكن حان الوقت لأن نتوقف ونحافظ على استقرار الجنيه وبالفعل نقطة كويسة أن مبقاش في تعويم المرة اللي فاتت دي مع رفع سعر الفائدة".