أحمد موسى: الجنيه فقد 20% من قيمته خلال 3 أشهر
أكد الإعلامي أحمد موسى؛ أن هناك حالة ترقب داخل وخارج مصر لاجتماع لجنة السياسيات النقدية بالبنك المركزي والمقرر أن تنعقد غدا للبحث في موقف سعر الفائدة.
وقال موسى خلال برنامج "على مسؤوليتي" المذاع على قناة "صدى البلد": "الكل منتظر بكرة البنك المركزي هيعمل ايه؛ اجتماع لجنة السياسات النقدية غدا؛ بكرة كل التوقعات بنوك العالم والاستثمار والخبراء بيتكلم عن رفع أسعار الفائدة".
وأضاف: "الاهتمام بمصر في الخارج فوق الخيال؛ كل المؤسسات الدولية كل وسائل الاعلام الدولية والاقتصادية والتوك شو ومواقع فن ورياضة وقضايا والمال والأعمال كلها بتعمل تقارير عن الوضع الاقتصادي في مصر".
وتابع: "مافي موقع ولا برنامج ألا ومصر اخبارها اية؟ ووكالات الانباء كل يوم والتاني يطلعوا بتقرير؛ وكل يوم يعملوا نفس التقرير بصيغة أخرى ويعمل عليك ضغوط فتطلع رويترز تعمل تقرير النهاردة وأمبارح والفرنسية والأيه بي وكله بيشتغل على مصر".
وواصل: "البنك المركزي بكرة هيعمل اية هيرفع والا بكام؟ بنوك 15-20 أو 100 بنك عملوا استطلاعات رأي وكل واحد طالع يقول الخبير الفلاني وحد تاني يروح طابع ورقة يقولك دا هيرفعوا الفايدة وهتوصل قد ايه؛ حد تاني يقولك التوقعات بين 2 إلى 3% وناس تانية بتقولك طبعا والجنيه وهيبقي في خفض أخر للجنيه المصري وناس تانية تقولك الدولار في السوق الموازية بـ 35-36 جنيه وناس تانية تقولك العقود الأجلة تزيد عن 40 جنية للدولار".
وأوضح: "كل دة عامل ضغط كبير جدا؛ أنا كمواطن نزلت اشتريت أول رمضان تمرهندي؛ يوم الخميس اللي فات أول يوم رمضان وجيت اشتريته النهاردة زاد وحضرتك على طول هتعرف أن التضخم بيزيد؛ أي حاجة بتشتريها من أسبوع النهاردة زادت ومعناها أن التضخم يزيد".
وأكمل: "الشهر اللي فات مرينا بأكبر تضخم 40.3% والبنك المركزي عنده 8 اجتماعات في 2023؛ الجنيه فقد من يناير لحد النهاردة 20% من قيمته في 3 شهور ولو اتكلمنا على سنة؟ كل واحد عارف دخله اية وبقي كام".
واختتم: "نتيجة لكل دة في تداعيات وضغوط على الناس والمواطن لأن هو اللي حاسس بالموضوع؛ الحاجة بتغلي وأنت تقدر تحسب بالورقة والقلم؛ مصر فيها 100 مليون وممكن كل واحد يتكلم عن بيه أو منطقته ولكن مقدرش أقول الـ100 مليون كذا كل واحد ليه دخل معين ومعيشة غير الاخر ولكن الكل يتعرض للتضخم".
