"دي بقت خرابة".. عمرو أديب يعلق على خسارة الزمالك أمام البنك الأهلي

أكد الإعلامي عمرو أديب؛ أن نادي الزمالك يمر حاليا بحالة انهيار مشيرا إلى الخسارة الثقيلة التي تلقاها فريق الكرة أمام البنك الأهلي بثلاثية نظيفة في كأس الرابطة.

وقال أديب خلال برنامج "الحكاية" المذاع على قناة "أم بي سي مصر": "الزمالك اتغلب من البنك الأهلي 3-0؛ في عام 2023 الزمالك لعب 17 ماتش اتغلب في 10 رقم قياسي عالمي جديد لنادي الزمالك؛ احنا مبنتكلمش على فرقة احنا بنتكلم على خرابة".

وأضاف: "اللي مش مصدقني يبص على الجول التاني أمبارح؛ توريلك حالة فرقة نادي الزمالك؛ الخرابة الكورة اتلعبت كأنها اترمت في الخرابة اترمت ورا دفاع الزمالك الخرابة اللي محدش قادر يجري؛ اللاعيب بتاع البنك الأهلي كل لاعيبة الزمالك وقفت اتفرجت عليه يقولك ياه احنا لسة هنجري وراك؛ اكتشفوا قبل الراية الركنية أن الكرة بطئية جدا".

وتابع: "تلات أجوال في سبع دقائق رقم قياسي عالمي جديد؛ على فكرة الموضوع مش غريب هي اللاعيبة دي أنت طالب منها ايه؟ مفيش مدرب كل يوم ينزلوا التدريب يلقوا حد جديد؛ النهاردة الخواجة مشي النهاردة أسامة نبيه النهاردة عبد المقصود النهاردة هنجيب واحد أجنبي؛ كل يوم نازل التدريب ومش عارف مين اللي موجود".

وأكمل: "النادي الثاني الأكثر شعبية في مصر والعالم العربي معندوش مدرب واللاعيبة مبتقبضش ورئيس النادي كان في السجن وهما خلاص عرفوا لا في أفريقيا ولا دوري ولا رابطة؛ الغرض انتهي معقولة يا جماعة دة يتعمل في الزمالك؟ هل من الممكن أن في نادي الحياة بتاعته تبقي عاملة كدة؟".

وواصل: "أنت عندك الإمكانيات والجمهور وعندك كل حاجة ليه بنتهان؟ احنا امبار كنا بنتهان؛ أمبارح كانت هزيمة معينة؛ في حد امبارح كان بيتريق في عيل صغير نزل الملعب قالك هيجب الرابع في عواد؛ اللاعيبة لا عندها هدف ولا روح؛ جمهور الزمالك حزين ومضايق وأخرتها؟".

واختتم: "ياجماعة هاتوا اللي انتوا عايزينه انما المشهد دة مينفعش؛ في النهاية يطلع حد يقولك النادي أكبر وأعظم؛ لا أكبر ولا أعظم احنا بنتهان علاولة بقينا تريقة وبقينا مسخرة مين السبب في الكلام دة؟ أحنا مش عارفين نثبت حتى مدرب".