محمد الباز يستعرض تقرير التايم عن "أهرامات الجيزة والمتحف الكبير"
استعرض الإعلامي محمد الباز اختيار مجلة التايم الأمريكية؛ لأهرامات الجيزة كواحدة من أفضل الوجهات السياحية في العالم.
وقال الباز خلال برنامج "أخر النهار" المذاع على قناة "النهار": "ننبه لحاجة مهمة جدا وهي أنه ياريت نشوف بلدنا بعنين الناس اللي برة؛ على سبيل المثال غلاف مجلة تايم الامريكية؛ حاطه صورة الاهرام على الغلاف".
وأضاف: "المجلة عاملة موضوع مهم بتقول للعالم كله أن دي أفضل الوجهات السياحية في العالم؛ يعني أنتوا عايزين تسافروا تروحوا تزورا أماكن؛ الجيزة منطقة الأهرامات أفضل الوجهات السياحية في العالم فروحوا زوروا هذا المكان".
وتابع: "بطبيعة الحال في أماكن أخرى ولكن أن يتصدر الغلاف صورة من مصر دا ليه دلالة مهمة؛ هما عملوا الموضوع ازاي جابوا المراسلين بتوعهم حول العالم والمراسلين رشحوا الأماكن اللي هما شايفين أنها وجهات سياحية مناسبة وكان الاستقرار على الاهرامات".
وواصل: "واحد يقولي طيب مهو دا طبيعي الأهرامات وأبو الهول من عجايب الدنيا السبعة وفي ناس مفتونة بالأثار المصرية القديمة دا الفراعنة مش احنا أقولك لما تقرأ الموضوع هتلاقيه مش بيتكلم بس عن الأهرام ولكن عن الجيزة وقالك أنه هيتم افتتاح المتحف المصري الكبير وهو أكبر متحف للأثار في العالم ودة كلامهم هما".
وأكمل: "دا أكبر متحف للأثار في العالم 100 ألف قطعة أثرية بالإضافة للفتنة الكبرى في المتحف المصري الكبير وهو مجموعة توت عنخ أمون؛ الأشارة واضحة بالماضي والحاضر؛ أه بنتحفي بالأثار المصرية واجدادنا ولكن لما تروح للمتحف الكبير وتشوف البناء بتاعة وتصميمة؛ تقول أه دة امتداد للفراعنة؛ يعني أنت بتقول الفراعة دول أعظم ناس مهو اللي هنا فراعنة واللي بني المتحف الكبير دول فراعنة المهندسين والفنيين والعمال؛ دا تنبيه ياريت نشوف بلدنا زي ما العنين برة بتشوفها".
ونشرت مجلة التايم الأمريكية تقريرًا، حول منطقة أهرامات الجيزة، والمتحف المصري الكبير وأكدت أنهما وجهتين تستحقان الزيارة، وأنه جاء الاختيار بناءً على توصيات مراسلي الشبكة الدولية للمجلة.
وأشار المقال إلى افتتاح مطار سفنكس الدولي في نوفمبر الماضي والسماح بالزيارات الإرشادية للمنطقة التجارية ومنطقة البهو بالمتحف المصري الكبير الذي ينتظر العالم افتتاحه، بالإضافة إلى التنويه عما يحتويه المتحف من قاعات وكنوز سوف يستمتع بها الزائر عند افتتاحه.
