أول تعليق من عمرو أديب على خسارة الزمالك من إنبي: ربنا رد لي اللي عملته
علق الإعلامي عمرو أديب، على خسارة الزمالك أمام إنبي بهدفين دون رد في المباراة التي أقيمت بين الفريقين مساء اليوم ضمن منافسات بطولة الدوري.
وقال أديب خلال برنامج "الحكاية" المذاع على قناة "أم بي سي مصر": "ربنا أراد أنه يرد لي اللي عملته إمبارح.. وأنا إمبارح كنت في حالة كروية ليست لطيفة.. والنهاردة أنا شربت من نفس الكاس وبقيت فرجة لكل الناس".
وأضاف: "الزمالك النهاردة بهدلني فريق أهتم بلا أسنان بلا فاعلية بلا رغبة بلا قدرة تحس أنها فرقة مش عارفة أنا مين أنا أزاي؛ يا جماعة أحنا دخل فينا جولين وسط حراسة مشددة؛ أخونا علي فوزي بتاع أنبي أربعة من الزمالك واخدينه حرس شرف".
وتابع: "أنت معندكش لعيب قادر أنه يعمل فرق؛ زيزو تعبان وزهقان واللاعيبة اللي عندك عادية لأنك بعت اللاعيبة غير العادية وجيت لاعيبة عادية؛ كل هذا الزحام لا يساوي شيء؛ دي فرقة تعلم أنها تلعب في نادي كله مشاكل وخناقات جوة وعقود بتتسرب ورئيس نادي مش عارف ايه هي فرطت من الزمالك ومفيش زمالك".
وواصل: "أنت بتلاعب فرقة نازلة درجة تانية هو بيناضل من أجل البقاء التلاتة اللي بهدلنا الدنيا عشان نسجلهم ولا حد فيهم عمل حاجة في نهاية الأمر أنت فريق بلا فاعلية".
وأوضح: "أنت واصل لمرحلة أنك مش عارف تبقي الرابع حتى شيكابالا التلت ساعة اللي كان بيلعبهم مفيش أنت عندك ربع فرقة كانوا عظماء ودلوقتي مش موجودة".
وأكمل: "فرقة محطمة وأنا رأيي أن فيريرا أيامه بقت معدودة؛ فيريرا قاعد عشان العقد هياخد مبلغ وقدره؛ هو في فرقة تعمل كدة مدرب يمشي وبعدين يرجع ويوم لا ويوم أه".
وذكر: "مش فاهم في ايه؛ ازاي الكرة عندنا مستواها بقي عامل كدة؛ سيبك من الأهلي أهو الأهلي عنده حاجة يتكلم فيها ولكن احنا هنتكلم في أيه؟ كنا بدون مجلس إدارة وخدنا دوري وكأس؛ الشباب بتوع إنبي بياخد الكرة من نص الملعب وبيجري وأنت تجري وراه".
واختتم: "دا في كورة المهاجم كان وراك وبقي قدامك وبيجري ومش عارف توصله؛ طبعا هيبقي في مليون شماعة أصل اتحاد الكرة أصل الأهلي أصل المؤامرة؛ لا أصل الحكاية أن الفريق سيء جدا وهذا الرجل عنده إحساس أدينا بنشتغل وخلاص وبنقبض بالدولار؛ النهاردة أنت بتلاعب فريق هينزل درجة تانية أجبلك مين تكسبه؟ أنت مش عارف تنقل كورة مفيش حلول ومفيش دقة".
