تعليق ناري من أحمد موسى على هزيمة الزمالك أمام إنبي
علق الإعلامي أحمد موسى، على خسارة فريق الزمالك أمام إنبي بهدفين دون رد في المباراة التي أقيمت بينهما مساء اليوم ضمن منافسات بطولة الدوري.
وقال موسى خلال برنامج "على مسؤوليتي" المذاع على قناة "صدى البلد": "دا حال الكرة المصرية؛ الزمالك النهاردة بيتغلب 2 -0 من إنبي؛ شوف حال الزمالك النهاردة أيه إنبي نازل من أول الماتش يفوز الفرق فقدت الروح؛ شفت الشوط الأول ماتش الزمالك وأنبي سيء جدا".
وأضاف: "إنبي يسجل هدف ملعوب اللي هو مينفعش يعني دفاع الزمالك كان سرحان؛ دفاع الزمالك مكانش موجود أصلا؛ قعدت أدور على دفاع الزمالك إزاي كورة زي دي تعدي منك".
وتابع: "لاعبي إنبي هجمة تقريبا جاتلهم الشوط الأول بس هو جاي مركز أن الماتش ده أخلصه؛ الزمالك نازل إن أنا فايز وفي فرق النهاردة بتلعب كورة لا بتخاف من الزمالك ولا من الأهلي واحد اتنين ودخلت الشبكة ودا الجول الاولاني".
وواصل: "أنت وصلت بكام كورة وعملت ايه الشوط الأول والتاني؟ بتهاجم ومش عارف تجيب جول وإنبي راح جايب الجول التاني؛ في فريق بنص فرصة بيسجل جولتين وأنت يجيلك عشرين فرصة وهو دة الأداء؛ أنت نازل كزمالك عايز تفوز؟ لا هل دا الزمالك اللي كنا بنشوفه قبل كدة؟ لا؛ أنت الماتش ممكن كنت تخلص".
وأكمل: "الزمالك عنده كل حاجة وعندك الدوافع أنك تفوز وتاخد التلات نقاط النهاردة؛ لا أخدت نقطة ولا تلاتة؛ إنبي فريق محترم وفريق مجتهد جدا اللي عملوه النهاردة بيأكد الكلام دة وبيأكد اللي احنا بنقوله؛ الدول الأولاني أتعادلوا واحد واحد؛ أنت النهاردة مش قادر تسجل جول".
وأوضح: "أنت بتلعب 96 دقيقة ومش عارف تجيب جول لحفظ ماء الوجه؟ مش معقول ياجماعة هو أنت اتاثرت بهزيمة الأهلي امبارح؟ تفتكروا؟ الأهلي يتغلب امبارح والزمالك يتغلب النهاردة وأنت كان جايلك فرصة على طبق من الماظ أنك تفوز وتبسط جمهورك فأنت النهاردة كزمالك تنكد على جمهورك وتبيت جمهورك مضايق وزعلان ويبقي عندك مشكلة وليلة حزينة على جمهور الزمالك".
واختتم: "انتوا بتعملوا في جمهوركم ايه؟ كلكم على بعض غضب جماهير امبارح الأهلي والنهاردة الزمالك هي اللاعيبة دي ايه؟ هو اللاعب لما بينزل مش عارف أنت في جمهور يفرحه؟ يا أخي اتغلب بس أدى كورة والعب".
