أحمد موسى يعلق على فوز الأهلي: "القطن الكاميروني مجاش"

علق الإعلامي أحمد موسى؛ على تحقيق الأهلي فوزه الأول في دوري المجموعات ببطولة دوري أبطال أفريقيا أمام فريق القطن الكاميروني في المباراة التي أقيمت بين الفريقين مساء اليوم.

وقال موسى خلال برنامج "على مسؤوليتي" المذاع على قناة "صدى البلد": "لسة الأهلي مخلص ماتش القطن الكاميروني وبداية إيجابية؛ 3 – 0 والماتش ده كان يخلص 5 أو 6 أو 7 القطن الكاميروني مجاش؛ فريق متواضع وأضعف فريق في المجموعة".

وأضاف: "الفريق دة بيتغلب من كل الفرق؛ لكن اللي عاجبني النهاردة؛ سألت مين رأفت خليل اللي سجل الهدف التالت؛ الجول التالت دة جول معلوب؛ جملة تكتيكية ملعوبة من قندوسي إلى علي معلول إلى رأفت خليل؛ جملة واحد اتنين تلاتة جول".

وتابع: "قالولي رأفت خليل ناشئ ويسجل في دوري الأبطال بس الولد ما شاء الله عليه؛ ثابت وراكز وعنده ثقه في نفسه وكأنه بيلعب بقاله عشر سنين في الأهلي والماتش بالنسبة له عادي جدا؛ رأفت خليل النهاردة اللي عمله الجول التالت وعندنا النهاردة غيابات ستة؛ عندنا فريق برة بيتعالج".

وأكمل: "عندك الشحات برة والسولية برة وعبد القادر برة وكهربا برة وعندك اللي جوة يكسبوا النهاردة تلاتة صفر مع الرأفة والأهلي كان ممن يعمل سكور تاريخي ويعمل رقم كبير مستغلناش الفرص لا الشوط الأولاني ولا التاني؛ أنا كنت بدور على الشناوي وأنا بشوف الماتش هو الشناوي فين قاعد برة بيشرب شاي؟".

وأوضح: "الأهلي لعب مباراة عشان يعود؛ الأهلي عنده 4 نقاط وموقفه صعب والصعود في أقدام النادي الأهلي بتاعتك مش بتاعة غيرك؛ أنت معاك 3 ماتشات ومحتاج منهم 7 نقاط خدت سبعة نقاط صعدت ولا قدر الله حصلنا أي تعثر يبقي مش مكتوب لنا السنادي دوري الأبطال".

واختتم: "لو أنت عايز تصعد عليك تفوز على الأقل ماتشين من التلاتة اللي فاضلين؛ والنهاردة بداية إيجابية خلاص أنسوا الماتش عشان عندكم ماتش بعد بكرة في الدوري أمام المقاولون ويادوب الأهلي يروحوا النهاردة بكرة ينزلوا يدربوا ثم يلعبوا بعد بكرة أمام المقاولون وبعدين يسافروا عشان يلاعبو صن داونز يوم السبت".