أحمد موسى يعلق على أداء الزمالك أمام سموحة: "والله فرحت"
علق الإعلامي أحمد موسى؛ على مستوى فريق الزمالك خلال مباراة سموحة والتي انتهت بفوز الفريق الأبيض بثلاثة أهداف مقابل هدف.
وقال موسى خلال برنامج "على مسؤوليتي" المذاع على قناة "صدى البلد": "لازم أتوقف دقائق قليلة؛ أول مرة تشوف نادي الزمالك عامل ملحمة؛ الشوط الأول دة مش الزمالك بتاع الفترة الأخيرة الزمالك رجع في الشوط الأول؛ تلاتة صفر الشوط الأول على سموحة هو دا الزمالك".
وأضاف: "أنا بتفرج مع زملائي الزملكاوية رجعت الناس فرحانة؛ هو عايزك تعمل اللي عليك؛ حتى لو اتغلبت؛ دول يمكن أسرع 3 أهداف في سبع دقائق؛ شيكابالا ثم زيزو ثم زيزو رغم اهدار ضربة جزاء؛ يعود الزمالك بشكل قوي جدا؛ دائما بنقول مفيش دوري ولا كورة بدون اهلي وزمالك".
وتابع: "أنا فرحت محبش جمهور الزمالك يبقي زعلان؛ أعملوا اللي عندكم عشان تسعدوا جمهوركم؛ إعصار زملكاوي الشوط الأول الزمالك نازل بروح وعايز يفوز؛ كشر عن أنيابه سموحة مسك كرة ولكن الزمالك في سبع دقائق خلص الماتش".
وواصل: "مفيش أجمل من كدة بصراحة هو حد عايز غير تلعب كورة وتلعب حلو وجمهورك يبقي مبسوط؛ أنت في الاخر بتشجع كرة قدم ونادي الزمالك عمل حفلة النهاردة في الشوط الأول؛ تلات اهداف وفي كورة النهاردة لسيف جعفر لعب ونزل يشوط ويشتغل".
وأوضح: "لازم ترجع وتعود لأن في الاخر عندك جمهور وملايين من جمهورك مستنينك تسعده محدش عايز مشكلة لا في الزمالك ولا الأهلي ولا أي نادي؛ زيزو النهاردة دا زيزو رغم أنه شاط أفضل ضربة جزاء ممكن يشوطها؛ مش دا زيزو اللي يشوط ضربة جزاء في السما خرجت من استاد برج العرب راحت مطار برج العرب".
وأكمل: "زيزو من أحرف اللاعبين في ضربات الجزاء ولكن رجعت الثقة وسجل هدف ولا أجمل؛ ودخل شيكابالا اداهم قوة والنهاردة مفيش هزار والنهاردة الناس كانت مستنية ومش عايزين اللي حصل الماتش اللي فات يتكرر".
واختتم: "بحييهم على الروح والأداء وسيبكو من أي حاجات على جنب النهاردة هو دة الزمالك الشوط الأول 3 أهداف تعمل ماتش حلو وتخلص خلال سبع دقائق".
