أحمد موسى منفعلا: طريق الواحات تحول إلى "جراج" بسبب الأمطار
علق الإعلامي أحمد موسى على توقف طريق الواحات نهائيا بسبب مياه الأمطار، مشيرا إلى أن السيارات أصبحت محاصرة بسبب المياه بمن فيها من مواطنين.
وقال موسى خلال برنامج "على مسؤوليتي" المذاع على قناة "صدى البلد": "أكبر جراج موجود في مصر، الحركة توقفت تماما على طريق الواحات منذ السابعة".
وأضاف: "الناس مش عارفة تتحرك والناس عربياتها وقفت، في ناس نايمين في عربياتهم مش عارفين يعملوا ايه مفيش حركة والدنيا وقفت والناس بتصوت".
وتابع: "ناس خرجوا من مدينة الإنتاج الإعلامي وموصلوش حدائق الأهرام، الأرصاد حذرت وقالت في مطر بكرة عملنا ايه في استعداداتنا فين عربياتنا أسيب الناس ازاي واقفة في الشارع كده".
وواصل: "اللي رايح الواحات أرجع أبعدوا عن طريق الواحات هذه الليلة؛ العربيات قدامها تلات أربع ساعات والناس واقفة مش عارفة تعمل ايه؛ ليه كدة؟ الله يكون في عون الناس تخيل نفسك في المشهد دة فجأة المطرة نزلت عليك؛ تعمل ايه؟".
وأوضح: "الناس عمالة تبعتلي على تليفوني الخاص، المنطقة دي مش ليها حد مسؤول؟ المنطقة دي تبع مين ما تقولولنا؟ ازاي محدش يتحرك كدة؟ أتحرك بعد ما يحصل طيب كنا فين قبل كده وعملنا مليون اجتماع يا جماعة استعدوا لموسم الأمطار؛ وشوفنا جاهزية موسم الأمطار شفناها دلوقتي أهو".
وأكمل: "من الأول يبقي عندي عشر عربيات في المنطقة الفلانية عشان منقفش كده، وبقولكم من الساعة سبعة ولسة الناس واقفة".
واختتم: "هو ايه اللي بيحصل وليه؟ لازم تحرك سريع ولازم نلحق الناس ياجماعة مش عايزين الناس دي تنام في الشارع؛ حرام وعيب".
