عمرو أديب: نفاق العالم في أفغانستان "غير طبيعي"
علق الإعلامي عمرو أديب، على موقف الولايات المتحدة والدول الغربية من قرار حكومة حركة طالبان في أفغانستان منع الفتيات من الدراسة بالمدارس والجامعات.
وقال أديب في مداخلة هاتفية مع برنامج "الحكاية" المذاع على قناة "أم بي سي مصر": "طالبان قررت أن مافيش بنات هتروح الجامعة؛ والولايات المتحدة بتقولهم يا جماعة متعملوش كدة والاتحاد الأوروبي بيقولك هسحب مؤسسات الإغاثة".
وأضاف: "نفاق العالم في أفغانستان غير طبيعي دي بلدهم بس أنا كمان كمواطن مسلم عربي لازم أقول إن ده مش صح ليه لأن في ناس بيحبوا طالبان بكرة يجيوا يطلعوا يقولك أيوه هو دة الكلام".
وتابع: "هتقولي هو ده ممكن يحصل في مصر؟ أنا اتعلمت من الأول كدة يعملوا اللي هما عايزينة والمجتمع الدولي يطرمخ عليهم زي ماهو عايز".
وواصل: "وزير التربية والتعليم الأفغاني قال لو ضربتونا بقنبلة ذرية مش هنرجع البنات تتعلم تاني وطالبان قالوا للأمريكان محدش يدخل أحنا نعمل في بلدنا اللي احنا عايزينه".
وأوضح: "الأمريكان والأوروبيين الموضوع بالنسبالهم مش مهم لأن دول على حدود مين ومحتاج قوات فين؛ ومن أول يوم عارفين أن دول مش صادقين وابتدا شوية شوية مفيش مذيعات في التلفزيون ومفيش ستات تشتغل في الحكومة لحد موضوع الجامعة".
وواصل: "واحد من بتوع طالبان دول كان في مذيع بريطاني مشهور بيعمل معاه مقابلة وقاله البنات قاله لا مفيش تعليم للبنات؛ قاله أنت بناتك بيتعلموا؟ الراجل اتلجلج فالمذيع قاله مش أنت بناتك في الدوحة بيدرسوا هناك؟".
وأكمل: "أنا ملياش دعوة بشئونهم الداخلية أنا بقول الكلام دة عشان الفكر دة ميتنقلش؛ مهي نفعت في أفغانستان ليه متنفعش؟ وهناك الجهات الدينية في مصر كان موقفها واضح".
وكانت الأمم المتحدة والعديد من البلدان حول العالم قد أدانت قرار طالبان بمنع تعليم الفتيات الذي يعيد أفغانستان إلى الحقبة الأولى من حكم طالبان حين لم يكن بإمكان الفتيات تلقي التعليم.
وذكر مفوض الأمم المتحدة لشؤون أفغانستان إن هذا القانون فيه خرق لحق المساواة في التعليم ويزيد من إقصاء النساء من مظاهر حياة المجتمع الأفغاني.
