أحمد موسى يرد على منتقدي تصريحاته عن حوار صلاح وجوارديولا

علق الإعلامي أحمد موسى؛ على تصيد البعض على وسائل التواصل على تصريحاته بشأن الحديث الجانبي بين محمد صلاح نجم ليفربول الإنجليزي وبيب جوارديولا مدرب مانشستر سيتي.

وقال موسى خلال برنامج "على مسؤوليتي" المذاع على قناة "صدى البلد": "بعد الماتش كان مدرب مانشستر سيتي بيتكلم مع محمد صلاح وأنا كنت بهزر وبقول جوارديولا بيقول تحيا مصر؛ خدوا الكلام وقالوا دا أحمد موسى بيقول أنا كنت بهزر هو حد سامع الحوار؟ هو أنتوا بيضايقكم تحيا مصر؟ طيب تحيا مصر أنت زعلان أنى بقول تحيا مصر؟".

وأضاف: "انتوا بتزعلوا لما بنتكلم على بلدنا ولا زعلانين عشان صلاح كان هو التريند؟ أمبارح سابوا الماتش وتعليقات الكرة الأرضية والإعلام العربي والعالمي ومسكوا في احمد موسى قال كذا هو أنا قلت أني مقلتش؟ هو حد سمع الحوار؟ كنت بتكلم على سبيل الهزار".

وتابع: "بتكلم وبقول إن هالاند اتغلب امبارح؛ أيوة اتكلمت أنه اتغلب دا مضايقكم أنتوا كمان؟ هالاند لم يؤدي ما عليه بالأمس ولم يكن في حالته لأن ليفربول كان أفضل والجول اللي سجله صلاح لو الكورة في رجل هالاند مكانش هيسجلها لأن صلاح حريف".

وواصل: "صلاح لاعب تقيل وجوارديولا لما شاف الكورة كان بيصوت؛ صلاح خد الكورة وعدا وجول؛ دا احسن مدرب في العالم وقع على الأرض لأن تقديره أن صلاح هيسجل".

وكان الإعلامي أحمد موسى قد أشاد بفوز فريق ليفربول على مانشستر سيتي بالهدف الذي سجله النجم المصري محمد صلاح موضحا أن خبرة صلاح قد حسمت الأمر.

وأوضح موسى تعليقا على الحديث الجانبي الذي اجراه جوارديولا مدرب مانشستر سيتي مع صلاح: "نفسي أعرف صلاح بيوشوش جوراديولا بيقوله ايه بعد الماتش، هل بيقوله هو أنت عارف أن في محمد صلاح في الملعب؟ أنا وش السعد وليس هالاند؛ صلاح بيوشوشه وبيقوله تحيا مصر؛ فريق مانشستر سيتي قيمته التسويقية أكثر من مليار يورو وجوارديولا عنده أفضل لاعيبة".

وأكمل: "ليفربول بردو عنده أحسن لاعيبة ودفاع ليفربول كان رئيس قفلوا على فودين وهالاند؛ هالاند بيقول يارب هو صلاح جالنا منين؟ النهاردة كتفوه في ليفربول دا يلعب كمال أجسام أو ملاكمة أو سلة مش معقول كرة القدم فيها اتنين متر ولكن عندنا النهاردة الخبرة العالمي محمد صلاح".

وذكر: "مبروك لمحمد صلاح ومبروك لينا الأداء لأخر ثانية وأنت مع السيتي لازم تلعب لحد أخر ثانية والحكم يصفر؛ وكان الحمد لله هذا الانتصار المثير".

واختتم: "صلاح أنت بترفع روح معنوية لـ 100 مليون من أهل بلدك؛ السيتي فريق قوي جدا منتخب عالم وليفربول قدر يوقف خطورة هالاند".