محمد الباز يطالب بإقالة إيهاب جلال: "ملوش علاقة بالكورة"

هاجم الإعلامي محمد الباز؛ إيهاب جلال المدير الفني للمنتخب الوطني مطالبا بإقالته وذلك عقب الخسارة أمام إثيوبيا في تصفيات أمم أفريقيا.

وقال الباز خلال برنامج "أخر النهار" المذاع على قناة "النهار": "مقدرش أتجاهل أبدا ما يمكن اعتباره مهزلة؛ الناس في مصر بتدور على أي حاجة عشان تفرح؛ لكن للأسف الشديد المنتخب ومدربه إيهاب جلال عكننوا على الناس".

وأضاف: "الأخ إيهاب جلال دة نكد على الـ 100 مليون مصري وببساطة شديدة الأمور بتعدي ومينفعش نتجاهل هذه المهزلة لأن دي مهزلة وقلة قيمة؛ هتقولي الكورة مكسب خسارة وانت نفسك قلت بعد مباراة غينيا قلت دي مباراة وأهو المنتخب كسب وبلاش نعمل نفسنا خبراء أنا قلت كدة لأنها أول مباراة والمنتخب كسب".

وتابع: "إيهاب جلال لا يصلح على الإطلاق لهذه المهمة؛ اتحاد الكرة عمل اجتماع عشان يناقش أسباب الخسارة وينظروا في قرار تقديم الشكر ليه ويقولوله شكرا منعطلكش مع السلامة وبعدين قالوا لا منقدرش ناخد القرار دلوقت وعندنا مباراة ودية مع كوريا الجنوبية".

وأوضح: "وجود إيهاب جلال نفسه عامل ربكة للاعيبة؛ المدير الفني لازم يبقي شخصية إيهاب جلال مش شخصية؛ لازم يبقي عنده كاريزما إيهاب جلال معندوش كاريزما".

وواصل: "مصر تدفع ليه تمن غالي جدا لأن المدير الفني للمنتخب لا عنده شخصية ولا كاريزما ولا خطة؛ أنا أول مرة أمبارح أعرف أن إثيوبيا عندها منتخب كورة".

وأكمل: "اللاعيبة لو راحوا كوريا من غير مدير فني مش هيحصل حاجة؛ أنا بتكلم على إيه الأزمة في الكورة محدش بيتحاسب من أيام كاس العالم في روسيا وأنت كل مرة مفيش حد بيتحاسب؛ بخسر وبخسر وباخد فلوس كتير كمان".

واختتم: "إيهاب جلال المفروض ملوش علاقة بالكورة؛ النجم بتاع إثيوبيا رجل محترف في فريق درجة تانية عندنا؛ في حالة استهتار واستهانة والناس مش جادة؛ أتخيل أن محمد صلاح بالمستوى اللي بيلعب بيه ممكن يكون لم يتخيل أنه يلعب في فريق بيدربه إيهاب جلال".