أبو جبل يفسر تصريحاته بشأن إصابة الشناوي: كانت تهريج

أكد محمد أبو جبل؛ حارس مرمى نادي الزمالك والمنتخب؛ أنه انتظر فرصة مشاركته مع الفريق الوطني في بطولة الأمم الأفريقية.

وقال أبو جبل في مقابلة مع برنامج "معكم" المذاع على قناة "سي بي سي": "لحظة نزولي في ماتش كوديفوار مكانش حد يتخيل أو يتوقع أن لما أنزل هكون في نفس المستوى دة كل الشعب وهو بيتفرج كان حاطط إيده على قلبه".

وأضاف: "في الكورة أن اللاعب اللي عنده حساسية الماتشات غير اللي برة والحمد لله ربنا أكرمني وكنت جاهز لأني كنت حاطط من جوايا أن بس تجيلي الفرصة أن أكون موجود في المنتخب ألعب وأمثل مصر".

وتابع: "أول ما الشناوي أتصاب لبست الجوانتي ووقفت على الخط؛ كان عندي إحساس أني هنزل في أي وقت ولكن مش بإصابة الشناوي وعمري ما اتمنيت أي حاجة وحشة لأي حد والشناوي جول كبير وأخ وزميل وصاحب".

واختتم: "أنا قلت امبارح أنا واقف على الخط ومش عايز الشناوي يقوم كنت بقول بتهريج لأن الشناوي قال هغير وفي مركزنا لما الحارس يطلب التغيير يبقي خلاص عارف أنه مش قادر؛ كابتن شوقي بيقولي أنت مش هتسخن قلتله أنا هسخن في الملعب بس نزلني".