أمير مرتضى يرد على مقارنته بـ سيد عبد الحفيظ
أكد أمير مرتضى منصور؛ المشرف على الكرة السابق بنادي الزمالك، أن منصبه في النادي كان يختلف كثيرا عن منصب سيد عبد الحفيظ مدير الكرة السابق بالنادي الأهلي.
وقال مرتضى في مقابلة مع برنامج "أسرار" المذاع على قناة "النهار": "أنا كنت المشرف العام على الكرة في الزمالك اللي بيوازيه في النادي الأهلي هو الكابتن محمود الخطيب لأنه هو المشرف على الكرة في النادي الأهلي".
وأضاف: "أنا مش عايز اتقارن بحد، أنا بشرح منصبي ومنصب كابتن سيد وكابتن محمود الخطيب، هما الاتنين أنجح مني وأحسن مني أنا مبتكلمش في ده أنا بشرح أنا بعمل إيه وهما بيعملوا إيه، أنا في الزمالك كان معايا الميزانية وبحط الاستراتيجية وأنا اللي بقول هنطلع كان ناشئ وهنبيع كام ونشتري كام، أنا اللي بتفق على الطيارات وبشتري اللبس وأنا اللي بختار المدير الفني وأنا اللي ماسك العقوبات واللي ماسك المكافآت والتقييم وفي النص عقود الرعاية وانا كل حاجة في الكرة كنت بعملها".
وتابع: "كابتن سيد عبد الحفيظ، كان مدير الكرة في النادي الأهلي وهو كان معاه اللايحة وفيها الخصومات والمكافآت وبيطبق سياسة النادي على الفرقة ودي شغلته وحاجة من الحاجات اللي بعملها هي دي وهو كان بيعمل الحاجة دي أشطر مني".
وأكمل: "كابتن سيد مخضرم كمدير كرة وهو مسيطر على الفريق بأنه كان لاعب كرة قديم وليه تاريخ في النادي الأهلي، وسنه عنده فارق زمني مع اللاعبين بيخلي في فارق محترم وهو بيطبق سياسة الإدارة جوة الفرقة".
وأوضح: "أنا اللاعيبة بتتعامل معايا كأني أخوهم الكبير أو قدهم وأنا بسيطر عليهم بحاجات تانية وبعوض الفرق بين إمكانيات نادي الزمالك والنادي الأهلي بحاجات تانية زي مثلا أشتغل على لاعب إنسانيا أجامله في حاجات وأديله هدايا ولو كان النادي موفرلي ده كنت عملته جوه النادي".
وأوضح: "أنا مش عايز اتقارن بحد خالص كلهم أحسن مني، في الآخر دا منصب ودا منصب، المشرف العام على الكرة في الزمالك كان أمير، والمشرف العام على الكرة في الأهلي كان كابتن محمود الخطيب، في الأهلي في لجنة التخطيط في الزمالك في أمير، في الأهلي لجنة التعاقدات برئاسة أمير توفيق في الزمالك في أمير مرتضى".
واختتم: "دا كان غلط جدا وأنا جالي انهيار عصبي في النادي ووقعت أكتر من مرة وكنت عايز أمشي ومش عارف أسيبها لمين، أنا كلمت ميدو قلتله أنا وصلت لمرحلة الانهيار".
