دائرة الطالبية والعمرانية.. خروج النائب محمد فؤاد من المنافسة
أعلن النائب محمد فؤاد، المرشح عن دائرة الطالبية والعمرانية، خروجه من المنافسة بعد إعلان المؤشرات الأولية.
وقال فؤاد على صفحته الشخصية بـ"فيسبوك": "رغم إن طول عمري مؤمن بالمنطق و الإصرار و المواجهة، النهاردة مش هقول حاجة و مش هشرح ملابسات و تفاصيل لأنها واضحة و باينة و مش محتاجة كلام كتير..
اولا: عايز أشكر كل حد شاركني في حلمي و كل حد صدق فيه و على رأسهم فريق العمل المحترم و كل الشباب الجميل.. ثانيا: عايز أشكر كل المحبين و الناس اللي تعبت معايا و الناس الي اتضايقت أو شافت غلاسة بسببي عايز أقولهم حقكم عليا كلكم.. ثالثا: الكلام عن النتيجة و منطقيتها و إزاي و فين، أمر أعتقد محتاجين نتجاوزه لأن ساعات المنطق بيكون عطلان بشكل يصعب أصلا إنك تتكلم فيه".
وأضاف: "أنا متشكر لكل حد قالي كلمة حلوة و شجعني و مسامح أي إساءة سمعتها.. وبالمناسبة إحنا كسبنا معركة الوعي.. وده يطمني إن الناس عرفت تختار بإرادة حرة بصرف النظر هنعلن إيه.. مش ندمان.. على الأقل إني حاولت.. بس يبدو إن القواعد اهتزت و ده بيصعب أي كلام.. يمكن لما الوضع يختلف، حد تاني يحاول من جديد".
ومن المقرر أن تعلن الهيئة الوطنية للانتخابات النتيجة الرسمية للانتخابات بعد وصول نتيجة تصويت المصريين بالخارج، والانتهاء من الفصل فى الطعون.
وتجرى جولة الإعادة بالخارج، أيام 21 و22 و23 نوفمبر المقبل، وفى الداخل، يومى 24 و25 من الشهر ذاته، بنفس الـ 14 محافظة وهى "الجيزة، الفيوم، بنى سويف، المنيا، أسيوط، سوهاج، قنا، الأقصر، أسوان، الوادى الجديد، الإسكندرية، البحيرة، ومطروح"، تمهيدا لإعلان النتيجة النهائية للمرحلة الأولى، بفوز 284 نائبا "فردى وقوائم" فى موعد أقصاه، 30 نوفمبر المقبل.
