"شكرا يا أبطال".. طبيبة تروي رحلة كفاحها ضد "كورونا" من داخل مستشفى العجمي بالإسكندرية

كشفت إيمان محمد، طبيبة أصيبت بفيروس "كورونا" وتوجد الآن فى الحجر الصحى بمستشفى العجمى بالإسكندرية عن تفاصيل إصابتها بالفيروس، قائلة: "سافرت السعودية مع زوجي وبدأت رحلة عمرة يوم 1 رجب.. مكانش فيه أخبار كتير زي دلوقت عن كورونا ، الوضع كان طبيعي جدا أول أسبوع في العمرة.. من تاني أسبوع عرفت أن تأشيرات العمرة وقفت".

واستكملت فى رسالتها عبر الصفحة الخاصة بها على السوشيال ميديا: "كنا آلاف من كل بقاع الأرض، لكن متوقعتش للحظة واحدة اني ممكن اتصاب واتعدي.. خلصنا العمرة ورجعنا مطار القاهرة فجر 15 رجب، الاحتياطات في المطار كانت قليلة فمحسناش بأي خوف أو قلق، كانوا بيقيسوا الحرارة فقط لعينة عشوائية مننا، أنا مثلا متقاسليش الحرارة وعديت عادي، أنا أصلا حرارتي مرتفعتش تماما لحد الآن، فالطريقة الوحيدة لتشخيص كورونا هو تحليل PCR".

وأضافت: "وصلت بيتي في آشمون وحضنت أولادي وبوستهم واتعاملت معاهم عادي جدا ودا كان غلط طبعا بلاش أي بوس  ولأن ربنا رحيم بعباده وبيسبب الأسباب فأنا مجاليش أي زيارات ولا حتى أهلي في الشهداء عشان العاصفة والأمطار اللي كانت موجودة.

وتابعت: "روحت شغلي في مستشفى جراحات اليوم الواحد في آشمون كطبيبة نسا لاني مسؤلة عن مرضي ونمت في سكن الطبيبات لأن المطار مقالناش نتعزل وانا معنديش أعراض".

وأضافت: "أحد الزملاء لاحظ أن لون وشي متغير، بلغ مدير المستشفى ونصحوني اعمل تحليل PCR , عملت التحليل فعلا روحت بيتي يوم الاتنين غسلت ونضفت الشقة كاملة، لما خلصت ريحت علي السرير، جالي مكالمة. د.ايمان يؤسفني أبلغك أن التحليل إيجابي.. حضرتك مصابة بكورونا.. جهزي حاجتك لأن فيه إسعاف هينقلك للمستشفى".

تتابع: "اتصدمت.. اتصدمت جدا ، نزلت الشارع بالليل أجري علي جوزي في صيدليته عشان أبلغه، وبكيت جدا، خايفة على بنتي اللي بوستها وعطست وهي وشها قريب مني، زملائي! حمايا اللي عنده 80 سنة وعنده سكر وضغط، أشمون هيحصل فيها كارثة بسببي؟..أفكار كتير ف دماغي ملخصها هو الشعور بالذنب ! زوجي طمني وقالي إن مصيرنا واحد .. وأنا ماشية بنتي فضلت تعيط جدا حاولت أطمنها عن بعد وأننا اكيد لنا لقاء تاني ومش دي النهاية" .

واستكملت: "وصلت مستشفى العزل في العجمي، مستشفى محترمة، غرفه كويسة فيها كل الاحتياجات الشخصية، معايا موبايلي وتلفزيون والمصحف وكتب النسا عشان أذاكر، مش معزولة عن العالم خالص.. عرفت أن تحاليل كل المخالطين ليا سلبية، دا أكتر خبر سعيد سمعته لأن الحمدلله كدا مافيش احساس بالذنب تجاه حد.. بشكر كل أبطال مستشفى العزل اللي في أوائل الصفوف على لطفهم الشديد مع كل المرضى؛ بشكر زمايلي وأهلي اللي بيخلوا يومي يعدي بدون اي ملل".