المصارع الهارب محمد الشامي: «الحياة بقت صعبة.. بحسبة بسيطة لو قعدت 15 سنة كمان مش هعرف أجيب شقة أتجوز فيها»| عاجل
أحدثت واقعة هروب المصارع المصري محمد مصطفى علي الشامي من بعثة منتخب مصر خلال فترة الترانزيت في العاصمة الإيطالية روما ضجة واسعة في الشارع المصري
رسالة محمد مصطفى الشامي
ووجه محمد مصطفى الشامي رسالة إلى والده وأسرته مؤكد أنه لم يرغب في الوصول إلى هذه المرحلة قائلا: "أنا اللاعب محمد مصطفى علي الشامي لاعب منتخب مصر للمصارعة الحرة بعتذر من والدي ومن أسرتي على كل اللي حصل وما كنتش أتمنى أبدًا إني أوصل للمرحلة دي".
وأضاف: "المصارعة كانت وما زالت جزء كبير من حياتي بدأتها من وأنا عندي ٧ سنين وعشت سنين طويلة بحلم إني أرفع علم مصر وأحقق إنجاز يفضل فاكرينه".
محمد مصطفى الشامي: الحمد لله قدرت أرفع علم بلدي في بطولات أفريقيا
وتابع: "الحمد لله قدرت أرفع علم بلدي في بطولات أفريقيا وبطولات دولية كتير وكان أكبر حلم عندي إني أحقق ميدالية أولمبية وأوصل لأعلى مكان ممكن في الرياضة اللي حبيتها وعشت عمري كله عشانها".
وتكشف كلمات الشامي عن أن قرار مغادرة البعثة من وجهة نظره لم يكن تخليًا عن المصارعة أو عن حلم تمثيل مصر وإنما جاء بعد فترة من الضغوط الشخصية والمادية التي قال إنها جعلته يعيد التفكير في مستقبله.
وأوضح اللاعب في رسالته:" لكن في لحظة معينة حسيت إن والدي تعب وإن الحياة بقت صعبة عليه وأنا أكبر إخواتي فكان لازم حد يضحي ويتحمل المسؤولية أنا بعتذر مرة تانية لوالدي ولأسرتي وبعتذر لكل شخص وقف جنبي وساعدني وساندني في مشواري ومش هنسي أبدًا وقفة أي حد معايا.. بس غصب عني أنا لقيت نفسي كبرت وما بقيتش عارف أطلب من والدي حاجة والدعم اللي بيجي لي ما يخلنيش أعيش حياة كريمة وأنا لازم أأمن نفسي وأأمن حياتي ودا مش موجود وكان لازم دا يحصل لأن أنا لو لا قدر الله كان حصل إصابة ما كنتش هلاقي أو بطلت مصارعه ما كنتش هلاقي دعم بعد كل اللي أنا حققته من إنجازات”.
ورغم القرار الذي اتخذه شدد الشامي على أن علاقته بالمصارعة لم تنته وأن حلمه في الوصول إلى أعلى المستويات لا يزال قائمًا.
وقال:"يمكن الطريق اتغير ويمكن الحلم اتأجل لكن الحلم نفسه لسه موجود وإن شاء الله هرجع أكمل مشواري وأرفع علم بلدي من جديد وأحاول أحقق الحلم اللي ما قدرتش أحققه لحد دلوقتِ ربنا يكتب لي الخير".
واختتم اللاعب رسالته بتأكيد حجم الأزمة التي يرى أنه كان يواجهها على المستوى المادي قائلًا: "بحسبة بسيطة أنا لو قعدت 15 سنة كمان في نفس المكان اللي كنت فيه مش هعرف أجيب شقه أتجوز فيها وشكرًا"
