خداع النقاب.. سائق توكتوك يكشف لحظات الرعب قبل جريمة قتل سيدة زنين (مستند)
في واقعة هزت الرأي العام بمحافظة الجيزة، كشف سائق توكتوك تفاصيل رحلة عادية تحولت إلى مشهد مريب يثير الشكوك، بعدما طلب منه أحد الأشخاص توصيلة عادية، ليكتشف لاحقًا أن الركاب غيروا ملابسهم وارتدوا النقاب لإخفاء هويتهم، التحول المفاجئ للأحداث كشف خيوط جريمة قتل سيدة زنين، حيث تحولت التوصيلة البسيطة إلى مشهد جريمة ؟
وفي السياق يستعرض «الرئيس نيوز» نص التحقيقات مع سائق التوك توك.
س/ ما صلتك بكلًا من المتهمان ١- / حسن محمد إسماعيل محمد جوده، ٢- / فراج علم الدين محمد علم الدين؟
ج/ حسن أنا عارفه من زمان عشان كان معاه توكتوك، وكان مشغله في الموقف اللي أنا شغال فيه، إنما اللي اسمه فراج أنا معرفوش وأول مرة أشوفه، كان مع إسلام في اليوم اللي حصل فيه المشكلة.
س/ ما هي طبيعة العلاقة فيما بينكما وهل من ثمة خلافات؟
ج/ لا، العلاقة مجرد معرفة يعني ومفيش بيننا خلافات ولا أي حاجة.
س/ إذًا ما معلوماتك بشأن الواقعة محل التحقيق؟
ج/ هو اللي حصل إني شغال سواق توكتوك في موقف الطابق ببولاق الدكرور، وأنا واقف هناك لقيت حسن جالي وراح ندالي وقالي انه عاوزني أروح معاه مشوار، فأنا سألته إيه هو المشوار قاله إنه لي ورق عند مراته الثانية وعايز أجيبه، فانا قولت له ماشي وراح واخد رقمي وقالي هكلمك كمان ساعة وهقولك هنتقابل فين، وفعلا بعد حوالي ساعة كلمني وقالي تعالى عند الشوربجي وفعلا روحتله وكان معاه اللي اسمه فراج، وإحنا ماشيين لقيته راح مطلع هدوم من شنطة كانت معاه ويبدأ يلبس هو واللي اسمه فراج، فانا سالته إنت لي بتعمل كده قالي عشان مش عايز حد يشوفني، ووصفلي أمشى إزاي لحد وما وصلنا عند ميدان الجمهورية، وراح قالي نزلنا عند البيت اللي تحت القهوة وفعلا رحت قدام البيت ونزله ودخلوا البيت ومشيت وبعد حوالي نصف ساعة لقيت إسلام كلمني وقالي تعاله عند البيت اللي نزلنا عنده عشان تاخدنا، وفعلا رحتلهم وأول لما وصلت عند البيت لقيت اللي اسمه فراج نزل الأول ووراه حسن ورحنا مشينا لحد ما وصلتهم عند الرشاح ومشيت وهو ده كل اللي حصل».
س/ وما هي حالة المارة بمكان الواقعة آنذاك؟
ج/ أيوة كان في ناس كتير في الشارع عشان في وش باب العمارة في فرن عيش وكان زحمة.
س/ وما التصرف الذي بدر منك عقب ذلك؟
ج/ أنا مشيت وساعتها حسن قالي إنه هيكلمني بعد ما ينزل.
س/ وهل قام المتهم/ حسن محمد إسماعيل محمد جوده - بمهاتفتك؟
ج/ أيوة.
س/ وما مضمونها؟
ج/ هو قالي انت فين قولتله أنا شغال راح قالي طب تعالى عند البيت اللي انت نزلتني فيه.
س/ وما هي المدة المستغرقة بين توصيلك للمتهمان بمكان الواقعة ومهاتفتك؟
ج/ حوالي خمسة وعشرون دقيقة تقريبًا.
س/ وما الذي حدث بعد ذلك؟
ج/ أنا أول لما وصلت تحت البيت لقيت حسن نزل الأول، ومكنش لابس الهدوم اللي كان داخل بها البيت في الأول وبعده نزل فراج، ولابس نفس الهدوم الحريمي اللي كان داخل بها البيت في الأول.
س/ وما التصرف الذي بدر منك عقب ذلك؟
ج/ هما أول لما ركبوا معايا مشينا على طول، لحد لما حسن قالى وصلنا عند الرشاح ولما وصلنا لقيت فراج راح قالع الهدوم اللي كان لابسها وراح حطها في شنطة، وساعتها حسن قاله خليهم في التوكتوك، وأنا ساعتها قلت لهم محدش يسيب حاجة هنا وراحوا نزلم وأنا مشيت وهو ده كل اللي حصل.
س/ وبشأن ما شهدت به الآن بالتحقيقات وما المبلغ الذي تقاضيته من المتهم/ حسن آنذاك؟
ج/ هو إداني ٤٠٠ جنيه حساب المشوار وبعد كده لقيته إداني ١٠٠٠ جنيه.
س/ وما صلتك بالمبلغ المالي المضبوط وقدره ١٤٠٠ جنيه والسابق فضه ببداية التحقيقات؟
ج/ هي دي الفلوس اللي إسلام إدهالي.
س/ وملك من ذلك المبلغ؟
ج/ أنا كنت فاكرها فلوس إسلام بس بعد كده عرفت إن إسلام سارقها.
س/ وهل ترغب في استلام ذلك المبلغ؟
ج/ لا، الفلوس دي تروح لصاحب اللي مسروقة منه أنا مليش دعوة ومش عايزها.
س/ هل لديك أقوال أخرى؟
ج/ لا، تمت أقواله وتوقع منه بذلك
