حسام غالي يطلق تصريحات نارية حول الترشح لرئاسة النادي الأهلي
حل حسام غالي ضيفا في بودكاست "G.Talks" وأطلق العديد من التصريحات النارية جعلته يتصدر الترند الساعات الماضية.
حسام غالي يخرج عن صمته بشأن ترشحه لرئاسة الأهلي
أكد حسام غالي، عضو مجلس إدارة النادي الأهلي، أنه يطمح في رئاسة القلعة الحمراء، خلال السنوات المقبلة.
«ممكن أكون شايف نفسي رئيس النادي الأهلي، وممكن أحقق طموح الناس اللي شايفاني رئيس النادي الأهلي، وممكن أحقق لهم اللي طول عمرهم بيحلموا بيه كنادي ومبادئ النادي وشخصية النادي وكيان النادي، عشان أنا حافظه وعارفه كويس أوي ومتربي على المبادئ».
وأضاف: «لما دخلت الإدارة وشوفت الدنيا على حقيقتها مش من بعيد زي ما كنت بلعب كورة، دلوقتي شايف الموضوع بوضوح أكتر وبحس إني مش قادر أمسك سيف ودرع وأدخل المعركة دي حاليًا».
«مش قادر أمسك سيف ودرع وأدخل حروب غير شريفة»
وتابع: «طول عمري ماسك سيف ودرع من وأنا صغير لحد ما بطلت كورة، أنا كنت بحارب الناس كلها إعلاميون وجمهور ومدير فني مش واثق فيا، دايمًا كنت ماسك سيف ودرع وبحارب، ومخدتش استراحة المحارب، لأن بعد اعتزالي دخلت في العمل الإداري».
وأكمل: «أنا عندي الرغبة أبقى رئيس الأهلي في يوم من الأيام، بس حاليًا مش قادر أمسك سيف ودرع وأدخل المعركة دي بعد ما شوفت وحاشة الموضوع وضخامة الموقف وتكالب بني آدمين كتير وصراعات كبيرة أوي إن هي تبقى في الحتة دي وعندها تطلعات أو عندها غرض تدي للشخص اللي الجمهور شايف أنه ممكن يبقى رئيس النادي ويحقق طموحاتهم، تديله بالكتف أو بخنجر«.
وواصل: «البعض يحاول تشويه صورتي لأن الجمهور شايف إني ممكن أبقى رئيس النادي الأهلي، أو يخلوا الانطباع اللي متاخد عني غلط (انتوا بتفكروا غلط ده مينفعش)».
حسام غالي عن أول قرار في حال رئاسته للنادي الأهلي
كشف حسام غالي عن أول قراراته في حال وصوله لرئاسة النادي الأهلي:«أول حاجة هعملها لو بقيت رئيس النادي الأهلي، هختار ناس حواليا بشخصية النادي الأهلي، ناس عندها إنكار ذات، ناس عندها طموح، وتشتغل بروح العمل الجماعي مش الفردي، وناس مش متسلقة وشخصيتها قوية».
وأضاف: «أنا بحب الناس اللي تشتغل معايا تكون شخصيتها قوية، لكن مش بالطريقة المتسلقة اللي تقول (أنا اللي بعمل وأنا اللي موجود)، في الآخر النادي قائم على العمل الجماعي. نفسي الحاجات دي ترجع زي ما كانت زمان».
