لطفي لبيب: السعدني ترك الساحة بمزاجه.. والدراما حاليا أكثر هبوطا
أكد الفنان لطفي لبيب، أن أهم ما يميز الفنان الراحل صلاح السعدني كان الثقافة الواسعة والوعي، مشيرا إلى أنه كان أحد الفنانين المحبوبين.
وقال لبيب في مداخلة مع برنامج "صالة التحرير" المذاع على قناة "صدى البلد": "الثقافة أهم ما يميز صلاح السعدني؛ صلاح من الممثلين المثقفين وبيتسم بالوعي؛ واعي جدا جدا وأنا اشتغلت معاه مسرح لمدة 6 سنوات تقريبا في مسرحة الملك هو الملك".
وأضاف: "صلاح السعدني اللي يشتغل معاه يعرف صلاح السعدني وهو بيخاف على اللي معاه جدا، اشتغلت معاه سينما وتليفزيون ومسرح وهي صديقي شخصي ليا جدا".
وتابع: "أخر مرة تواصلت معاه كانت قبل ما يعتكف في البيت وميشوفش حد وتصادف ده مع إصابتي بجلطة في المخ وانا في مصر الجديدة وهو في الشيخ زايد وكنا مبنشوفش بعض ولكن بنتواصل عن طريق أحمد السعدني لأنه أبني".
وواصل: "أخر مكالمة بينا كانت زي الفل ومكانش تعبان؛ وكان أخر كلام سمعته منه يبدو أن احنا خلاص ملناش في اللعبة دي وفي ناس جديدة جات وربنا يوفقهم؛ هو ترك الساحة بمزاجه لدرجة أن التكريمات اللي اتعملت له لم يحضرها ولما سألت أحمد قالي هو حابب ده".
وأوضح: "هو مقالش هعتزل ومقالش حاجة ولكن عمل ده كان في 2015، هو مكانش لاقي الدراما اللي كان بيشتغلها، وهو كان عنده حق، إحنا عملنا الدراما الصح ولكن الدراما اليومين دول أكثر هبوطا".
وتوفي الفنان صلاح السعدني عن عمر ناهز 81 عاما، حيث اختار الفنان الراحل اعتزال التمثيل في صمت، قبل 10 أعوام، تزامنًا مع احتفاله بعيد ميلاده السبعين.
