عمرو أديب: "الناس اللي قاعدة تدي الشعب أمال فارغة قولوا للناس الحقيقة"
أكد الإعلامي عمرو أديب؛ أن الدولة لابد أن تتحرك من أجل استغلال الحلول المتاحة للأزمة الاقتصادية الحالية وابعاد البيروقراطية التي تعطل عملية الطروحات الحكومية.
وقال أديب خلال برنامج "الحكاية" المذاع على قناة "أم بي سي مصر": "أنا عندي قناعة أن في مجموعة من الموظفين موقفين الدنيا؛ الحاجات اللي راحت صندوق مصر السيادي أخبارها ايه؟ الشركات المطروحة للبيع أخبارها إيه؟ الأراضي على سواحل البحر المتوسط والبحر الأحمر أخبارهم إيه".
وأضاف: "المركزي النهاردة مطلع أن عليك 32 مليار بنهاية السنة هتجيبهم منين؟ كل واحد بقي بيتفلسف شوية؛ أنت أصلا اقتصاد ريعي؛ كنت بتقعد في قناة السويس ولكن اترزعت النص؛ التصدير نزل والمصريين في الخارج قلوا".
وتابع: "انما ايه الحق لقينا معاه 7 آلاف ريال و1500 دولار دا غير اليوروهات؛ انتوا عارفين مصر بتصرف كام؟ يقولك احنا دخلنا البريكس مصر مش هتتعامل أبدا بالدولار دا زي دولة ايه؟ انت النهاردة عندك مناقصات قمح اشتريتها من الدول اللي بتستخدم الدولار".
وأوضح: "كل شوية بيقولوا للناس حاجة؛ المواطن المصري بقي بيدقق أوي أنت قلتلي البريكس هتعمل؛ لا البريكس هتخفف شوية مع إخواننا في الصين؛ ما تقولوا للناس الحقيقة؛ على فكرة ياجماعة إحنا وضعنا كذا؛ كلكوا اتفقتوا أن العالم لن يسمح أن مصر يبقي فيها مشكلة خير وبركة؛ دورك وأدائك ووضعك أدى أن العالم يقولك أنا عايز أوضبك وأنا حاسس بوضعك".
وأكمل: "الراجل تاكر كارلسون اللي عمل اللقاء مع الرئيس بوتين؛ راح نازل السوبر ماركت في موسكو واشتري نفس الحاجات اللي بيشتريها في بلدهم؛ ولقي الحاجة اللي بيشترها في أمريكا بـ 400 دولار وفي روسيا بـ 100 دولار وقال دة معناه أن البلد دي اقتصادها منهارش".
وذكر: "احنا عندنا فرص كتيرة ولكن يبدو أن في حد مبيمضيش الورقة وأنا عارف الطريقة البيروقراطية المصرية غير طبيعية؛ انا بغسل أيدي من الناس اللي قاعدة تدي الشعب أمال فارغة وكاذبة فليصمتوا بقي قولوا للناس الحقيقة".
واختتم: "من يومين علبة السجائر زايدة 11 جنيه ومن يومين السجائر الشعبية زايدة 3 جنيه؛ أنت بتقولي مصر جامدة وبتاع انزل ألاقي الأسعار غالية؛ أنا مبحلمش أن الأسعار تنزل أنا بحلم أنها تبطل ارتفاع".
