أحمد موسى عن أزمة المشردين في الولايات المتحدة: "ابنولهم إسكان اجتماعي"
علق الإعلامي أحمد موسى؛ على زيادة اعداد المشردين في الولايات المتحدة الامريكية مع غياب تام للتدخل الحكومي في مقابل الاهتمام الكبير بالتسلح.
وقال موسى خلال برنامج "على مسؤوليتي" المذاع على قناة "صدى البلد": "الإعلام الأمريكي على مدار الأيام اللي فاتت كله لا يتحدث ألا عن ألاف المشردين في الشوارع الامريكية؛ الألاف والشوارع كلها كده دي أمريكا؛ لما تشوف الأماكن دي لا يمكن أبدا ولما تشوف المشردين بص على الخيام اللي عاملينها في الشوارع".
وأضاف: "الاعلام الأمريكي بيقول إن في 75 ألف بيناموا على الرصيف في أمريكا والأرقام بتاعتهم مش بتاعتنا؛ حضرتك شايف المشاهد اللي بتوضح الوضع في الولايات المتحدة؛ لوس أنجلوس واحدة من المدن الغنية الناس نايمة في الشارع".
وتابع: "بتتكلم عن البلد الأكبر والاغنى اللي عندها كل حاجة؛ بص على الشوارع محتاج يتعمل فيها ايه؟ رقم 75 ألف دا لو في أي بلد؛ أمريكا يا جماعة الموضوع يعني وأنا بكلمك متعملش مقارنة مع الولايات المتحدة ولا دخل ولا عندهم ايه".
وواصل: "المشردين بيناموا في محطة أتوبيس؛ احتلوها وقعدوا فيها؛ الدول دي غنية جدا ومعندهاش أزمات دي اللي بتصنع الازمات في العالم وهما معندهمش أزمة خالص مرتبات ودخل وكل حاجة الأكثر عندهم بتلاقيها فين؟ طيب مش دول كانوا يلاقوا ليهم حل؟ مشهد لا تراه في دولة من دول العالم التالت".
وأوضح: "الدول الفقيرة بيحصل فيها عشان دول فقيرة طيب ايه مخلي أمريكا يحصل فيها كدة؟ مش قادرة تستضيفهم أو توفر ليهم سكن بدل ما هما في الشوارع شوية إسكان اجتماعي للمحتاجين؟ الناس دي الأكثر احتياجا عندهم ابنولهم شوية إسكان اجتماعي وأمريكا عندها مطبعة الدولار ليه سايب الناس كدة في الشوارع".
وذكر: "قاعدين أكلهم وشربهم وحياتهم في الشارع؛ البيت انتقل للشارع وتحولت الشوارع إلى منازل؛ موجودين داخل الولايات المتحدة الأمريكية؛ هي دي حقوق الإنسان؟ أمريكا لازم تدور على حق هؤلاء وهؤلاء ليهم حق يلاقوا مكان كويس".
واختتم: "حقوق إنسان مين يا سيدي؛ أمريكا أمبارح بيتكلموا على موازنة البنتاجون قرابة 900 مليار دولار داخل على تريليون دولار سلاح؛ الناس دول لهم حق لكن هو يتكلم على السلاح عشان دولة تعزو وتهدد العالم وسايبه الناس نايمة في الشوارع بدل ما يعيشوهم حياة كريمة".
