أحمد موسى يزف بشرى سارة بشأن أزمة السكر

أكد الإعلامي أحمد موسى؛ أن هناك بوادر لحل أزمة السكر، مشيرا إلى أن المصانع في مصر قد رفعت من طاقتها الإنتاجية من أجل مواجهة الطلب.

وقال موسى خلال برنامج "على مسؤوليتي" المذاع على قناة "صدى البلد": "يبدو اننا اقتربنا من حل أزمة السكر؛ حضراتكم عارفين ملفات الامن الغذائي هو ملفنا الشاغل طوال الوقت؛ النهاردة أقدر أقول لحضرتك أن هناك انفراجة قريبة جدا في موضوع السكر".

وأضاف: "في ضخ كميات كبيرة من السكر وتاني؛ كنا النهاردة في شركة السكر في الفيوم؛ النهاردة عندك 4 شركات سكر تضخ يوميا 8 ألاف طن والسعر 27 جنيه متدفعش ولا تلاتة تعريفة بعد الـ 27 ولو حد قالك أديني بكذا بلغ عنه".

وتابع: "السكر اللي نازل كله بـ 27 جنيه وزارة التموين زودت منافذ جديدة وفتحوا شرايين جديدة تساعد على وصول السكر لكل محافظات مصر؛ أي حد يبيع لك كيلو السكر أكتر من 27 جنيه بلغ فورا لأن واخده عشان يبيعه بـ 27 جنيه؛ مفيش حد كبير هتتاجر بالناس هيحصل فيك اللي حصل".

وواصل: "بيع السكر زي ما بيقولولك عليه؛ تم ابلاغ جميع المحلات والهايبر والماركت والمبادرات واللي ورا المبادرات؛ السكر اللي جالك دة هتديه للمواطن بكام؟ بـ 27 جنيه مفيش حاجة اسمها سكر بتلاتين والا أربعين ولا ستين؛ مصانع السكر دلوقت بتشتغل ومبيروحوش قاعدين 3 ورديات بيشتغلوا بكامل الطاقة قدامك أهو سكر الفيوم رفع طاقته اللي كانت 800 طن في اليوم إلى 1200 طن في اليوم".

وأكمل: "في أزمة صوتك بقوله دايما ولما أبدأ أحل لازم يتقال؛ أجهزة الرقابة مش هتسيب حد يتاجر بقوت الناس؛ كل حاجة تبقى موجودة وبسعرها المعتدل المعقول؛ لا قلتلك 15 ولا 16 بنقول بـ 27 جنيه".

واختتم: "حضرتك رايح تاخد سكر يقولك خد بضائع بـ 250 جنيه عشان تاخد كيلو سكر يقولك طيب خلال مش هتشتري يبقي الكيلو بـ 37 أو 40 جنيه؛ أماكن أقل شوية يقولك خد بضائع بـ 100 جنيه والمحلات الصغيرة يقولك خد شوية حاجات كدة بعشرين تلاتين جنيه".