تامر أمين: دعوة فرنسا لقمة إنسانية؟ "بتضحكوا علينا والا فاكرينا عبط؟"
علق الإعلامي تامر أمين؛ على القمة الإنسانية التي دعا لها الرئيس الفرنسي إيمانويل ماكرون لبحث الأوضاع الإنسانية في قطاع غزة.
وقال أمين خلال برنامج "أخر النهار" المذاع على قناة "النهار": "النهاردة قريت خبر؛ أن الرئيس الفرنسي إيمانويل ماكرون قرر يعقد قمة لمجموعة من كبار دول العالم غدا في باريس؛ والوزير سامح شكري وزير الخارجية سافر لحضور القمة".
وأضاف: "عنوان القمة ايه؟ قمة حول الأوضاع الإنسانية في غزة والحقيقة العجب الذهول والاستنكار اللي جوايا وصل لمرحلة مش قادر اعبر عنه؛ أنتوا لسة هتقعدوا بكرة عشان تتباحثوا حول الأوضاع الإنسانية في غزة؛ هي الأوضاع في غزة محتاجة تباحث وتحليل محتاجة أن احنا نحقق فيها إلى أي مدى وصلت إليه؟".
وتابع: "انتوا بتعملوا ايه؟ يا سياسي العالم انتوا بتضحكوا علينا والا فاكرينا عبط؛ حد بس يفهمني عشان دماغي هنجت وللدرجادي السياسة فاهمة الرأي العام والشعوب سذج وعبط ويضحك عليهم بأي حاجة ولما تكلم العالم الغربي والا أوروبا ولا بتاع يقولك احنا عاملين قمة اهو كتر خير فرنسا عاملة قمة وداعية كبار العالم عشان تشوف الأوضاع الإنسانية في غزة؛ ياسلام بلعنا الطعم خلاص طيب والله لازم نقعد ونقول كتر خيرهم الغرب أهو مش مقصر".
وأوضح: "كبار الدول اللي تقدر تضغط على إسرائيل وتطلع مشروع قرار من مجلس الامن سابت كل دة وعاملة عزومة بكرة في باريس عشان يقولوا الغزاويين مالهم بيصرخوا ليه يكونش حد مضايقهم؛ خلونا بكرة نقعد ونشوف الناس دي بتشتكي من أيه والله كتر خيركم يا فرنسا ويا أمريكا ويا أمم متحدة".
وواصل: "أنا بسأل مكرون؛ الرئيس الفرنسي القمة بتاعة بكرة هتقولوا فيها ايه؟ طيب ايه المطلوب منها طيب ايه المرجو منها؛ احنا نستنى القمة بتاعة بكرة نستني يطلع في الاخر ايه؟ هتقولوا اجتمع كبار العالم وتعاطفوا جدا وزعلوا جدا جدا على المستشفيات اللي بتتهد والابادة الجماعة اللي بتحصل لشعب وأننا نشوف طريقة ندخل المساعدات الإنسانية وأن احنا نحاول نشوف طريقة بس وكله هيلم ورقه وملفاته ويرجع لبلده ويبقي أسمه كدة فرنسا والغرب عملوا قمة عن الأوضاع الإنسانية".
واختتم: "زي ما راحوا زي ما اجتمعوا زي ما مشيو؛ لأن إسرائيل ملهاش علاقة باللي بتعملوه دة؛ نتنياهو دلوقت قاعد مبسوط وشايف القمم رايحة جاية وهو عمال يقتل".
