تامر أمين عن دعوات المقاطعة: "البراندات الأجنبية جابتلنا الفقر والمرض"
علق الإعلامي تامر أمين؛ على دعوات المقاطعة للعلامات التجارية الأجنبية العاملة في مصر والتي تدعم شركاتها الام الاحتلال الإسرائيلي.
وقال أمين خلال برنامج "أخر النهار" المذاع على قناة "النهار": "المقاطعة من ساعة ما ظهرت وابتدت تشد بقي ليها فريقين أو مدرستين وبالمناسبة الاتنين صح؛ الرأي الأول بيقول دي براندات أمريكية ولازم نقاطعها عشان يقل الدخل اللي بتصرف منه على إسرائيل ودة صح وحقيقي".
وأضاف: "الرأي التاني ودا بردو معانا في نفس المعسكر بيقول فكروا كويس حرام العمالة في كل الشركات دي مصرية ولو الشركات دي تضررت وقفلت فروع العمال هيبقوا في الشارع ودا بردو حقيقة الشركات دي كل اللي شغال فيها مصريين وبيقبضوا مرتبات من الشركات دي طبيعي لو اتقفلت الناس دي هتقعد في الشارع".
وتابع: "الرأيين صح بس خد بالك؛ مع أن العمالة كلها مصرية ولكن مجرد عشان حضرتك كشركة مصرية تاخد الاسم الامريكاني؛ لازم بتدفع شهريا او سنويا نسبة من ارباحك للشركة الام في أمريكا؛ ودا الاتفاق عشان تاخد الاسم بتاعي على المحل وتبيع عليه هتدفع نسبة للشركة الام وبالتالي جزء من الأرباح دي بتروح لصالح الكيان الصهيوني".
وأوضح: "الرأيين صح؛ طيب نعمل ايه؟ أنا هقولكم رأيي المتواضع؛ أولا الامر كله محلة النية؛ انت نيتك ايه وربنا يحاسبك على نيتك؛ عشان أحلها ليكم وأديكم دفاع للمقاطعة؛ أنا نيتي مش بس المقاطعة سياسيا؛ هي فكرة سياسية لمعاقبة الدولة اللي صدر منها فعل احنا رافضينه أنا بقولكم متعملوهاش سياسية خدوها من المنطق الوطني الاقتصادي".
وأكمل: "انا دلوقت هقاطع البراندات الأجنبية وخاصة الأمريكية؛ بس أنا بقولكم كمان بقي في الأساس فيها ان المقاطعة الحقيقة تقوم اقتصادك أنت؛ عندنا ناس كتير عايشة على فكرة عقدة الخواجة أي حاجة جاية من برة حلوة".
وواصل: "في حين أن كان زمان الفرق في الجودة والمنافسة كان يخليك عايش بالانطباع دة؛ دلوقت لا؛ أنا بسألكم كام محل بتاع شباب مصري بيعمل أكل زي الفل؛ لو قلت لكل واحد اعملي ليست هيقولي 10-15 مكان وأنا بقولكم كمان انه انضف في المكونات وأرخص من البراند اللي هاوسكم برة ده البراندات المصري في المكونات أنضف وأرخص بكتير".
واختتم: "شباب مصري محترم اشتغل الصنعة صح وحاطين تسعير صح وشغالين زي الفل؛ هوس البراندات الأجنبية في الوجبات السريعة مجبلناش غير المرض والفقر؛ المرض عشان بيحطولنا أزبل مكونات والفقر عشان غالي جدا وبنضيع عليه فلوسنا".
