عمرو أديب عن فشل مفاوضات سد النهضة: "لازم نفكر في الخطة البديلة"
علق الإعلامي عمرو أديب؛ على فشل جولة المفاوضات التي انعقدت اليوم في العاصمة الإثيوبية أديس أبابا حول قضية سد النهضة.
وقال أديب خلال برنامج "الحكاية" المذاع على قناة "أم بي سي مصر": "نحن الان في المفاوضات التي اتفقت اثيوبيا مع مصر أن تجريها من أجل التوصل لاتفاق ما؛ اليوم البيان المصري يتحدث عن تراجع مش بس لم يحدث شيء؛ هناك تراجع في الموقف الاثيوبي عن كثير من الأشياء اللي وصلنالها".
وأضاف: "نتحدث عن ملء لهذا السد لـ 90% منه وحتى الان لم نصل لأي شيء مع الجانب الإثيوبي؛ أظن أنه قد أن الأوان للتفكير في الخطة البديلة؛ أنا قلت بدل المرة مية أن الناس دي بتوع لوع وتراجع ومط وتسويف".
وتابع: "هو خلاص ملا؛ الملء انتهى واللي بنتكلم فيه أن في حالة الجفاف أو الجفاف الممتد أن هتفضل تفتح لي الماية قد ايه؛ الناس دي نحن لم ولن نصل معهم لاتفاق والخلاف دلوقت هو هيقف عند 49 مليار ولا هيملي إلى الـ 70".
وواصل: "أنا معرفش ايه الإجراءات اللي يمكن اتخاذها؛ المصريين كان نفسهم طويل أوي صبر غير عادي هل هما شايفين ضوء في نهاية النفق؟ جايز؛ البيان اللي قدامي بيان مصري فيه شكوى؛ أنت وصل لمرحلة وزير الخارجية بتاعك واقف في نيويورك بيقول احنا عملنا كل حاجة".
وأوضح: "جايز تحصل مفاجأة وجايز ربنا يكرم وجايز هما بيتطرفوا عشان لما يبقي فيه اتفاق أمضى على الحاجات اللي أنا عايزها ولكن بعد 8 سنين نية ايه حسن نية ايه؟".
وأكمل: "دي مسألة فيها حسابات كثيرة وأنا معنديش اقتراحات حتى؛ المسألة فيها حسابات كثيرة ويجب النظر لعناصر كثيرة حتى نصل إلى حل ما أو أنت هتعيش كدة على ما يحصل والله الماية عدت عدت والحمد لله هي بتعدي وهتعيش كدة وعلى الوعد بتاهم اللي بيقولوه ".
وذكر: "أنت حين تتحدث عن نهر ليس مغلق؛ دا نهر عابر للدول ومينفعش حد واحنا عندنا تجارب انظر إلى سوريا والعراق؛ الاتراك عملوا فيهم اية؟ الناس دلوقت بيمشوا في النهر؛ هل الأمور تترك وكده كده الماية بتيجي؛ هو عشان يشغل التوربينات لازم يفتح الماية تعدي؛ هما فهمونا أن إثيوبيا عاملة دة عشان الكهربا وهو سد تنمية وليس سد مياه".
واختتم: "هل هنقدر نوصل معاهم لحل أم انك هتضطر في النهاية تعمل إجراءاتك اللي بتعملها دلوقت وصرفت عليها مليارات".
