أحمد موسى يكشف تفاصيل انهيار حوض تبريد بمحطة كهرباء في أسيوط

كشف الإعلامي أحمد موسى عن تفاصيل انهيار جزء من حوض تبريد بأحد محطات الكهرباء في غرب أسيوط وهو ما نتج عنه خروج كميات كبيرة من المياه دمرت في طريقها عدة مقابر وأراضي زراعية.

وقال موسى خلال برنامج "على مسؤوليتي" المذاع على قناة "صدى البلد": "أهالينا في محافظة أسيوط وفي ماية كانت موجودة في حوض تبريد تابع لمحطة كهرباء؛ محطة الكهرباء على مساحة كبيرة وليها أحواض للتبريد؛ عملية فنية محتاجة حد فني يشرحها ولكن في 6 أحواض لمحطة الكهرباء على مساحة كام فدان وكل حوض تتجمع فيه الماية الخارجة من محطة الكهرباء وبيعاد استخدامها كمياه صرف صناعي".

وأضاف: "أحد الأحواض الستة كان في ماية اتجمعت فيه وتصل إلى 10-15 متر مكعب ولكن هي كميات كبيرة؛ أحد الاحواض حصل جزء منه انهار مسافة 6 أمتار والماية خرجت على مساحة كبيرة من الأرض قريب من محطة تكرير بترول ومقابر خاصة بالمسلمين والمسيحيين".

وتابع: "الماية دمرت أو خدت قدامها رفاة الموتى وخدت قدامها كمان طبعا زي ما احنا بنشوف بشكل واضح جرفت رفاة المتوفين دا يمكن كام ساعة وبسرعة مدير أمن أسيوط والحماية المدنية جريوا بسرعة لأنه في الاخر عايز تسحب الماية وتساعد الأهالي لأن رفات المتوفين بدأت تروح الترع والمصارف".

وواصل: "المشهد دة بعد كام ساعة اختفي وتم تخفيف الماية وسحبها ولكن حصل مشكلة كبيرة لأهالينا في منطقة غرب أسيوط؛ الأهالي زعلانين وفي 50-60 فدان الماية غمرتها بالكامل سواء بيوت أو مقابر تأثرت بشكل كبير جدا والماية خدتها إلى بعض الترع والمصارف".

وأكمل: "الناس بدأت الاستغاثة وبصراحة أجهزة الأمن اتحركت بسرعة والأهالي قالوا إن الامن بسرعة جولنا ولكن كنا محتاجين لدعم إضافي وأن الدولة تشوفلنا حل؛ الحل اللي طالبينه أن الناس يتعمل ليها تعويضات ويتعمل سور حوالين المقابر لأنه قد يحدث تاني".

وذكر: "لازم نعرف ازاي الحوض دة انهار كدة؛ حصل انهيار لمساحة 6 أمتار دفعت الماية بشكل كبير جدت وتدفقت للمنطقة وبتكلم عن 50-60 فدان تقريبا وراح 40-50 معدة للمنطقة وسحبت الماية عشان متدخلش على القرى المجاورة".