محمد الباز يشيد بحيلة الفنان أحمد أدم: "فضح صناع التريند"
أشاد الإعلامي محمد الباز، بالحيلة التي لجأ إليها الفنان أحمد أدم؛ لفضح تركيز بعض المواقع الإخبارية ووسائل التواصل الاجتماعي على السلبيات والإثارة.
وقال الباز خلال برنامج "أخر النهار" المذاع على قناة "النهار": "أنا الأول ببعت تحية للفنان أحمد أدم وبهنيه على عودة برنامجه أدم شو على قناة الحياة؛ ليه بحيي أحمد أدم؟ لأنه عمل حاجة كشف بيها فعلا عورة عدد من المواقع الصحفية وعورة السوشيال ميديا وسخافة وسقوط صناع التريند".
وأضاف: "هو في برنامجه عمل حيله وقال أنا هجيب حد مشهور وهعمل فيديوهين واختار تامر حسني؛ ادم في الفيديو بيمدح تامر حسني وبيقول عليه كلام كويس جدا وأنه بيفكره بتامر حسني".
وتابع: "بعد ما خلص الكلام الإيجابي عن تامر حسني قال كلام سلبي جدا عن تامر حسني؛ الفيديوهين بنفس الحلقة ونفس النفس تقريبا وأحمد أدم كان بيراهن على الجماعة اللي بيصنعوا التريند أنهم هياخدوا الفيديو اللي بيشتم فيه تامر حسني ويسيبوا الفيديو اللي مدحه فيه".
وأوضح: "وزمايلنا في قناة الحياة على السوشيال ميديا ذاعوا الفيديو اللي بيهاجم فيه تامر حسني؛ ونشروا الفيديو اللي هو بيمدحه فيه وإذا بالمواقع تقع في الفخ اللي كان أحمد أدم عاملة وتلاقي المواقع كل العناوين بتاعتها أحمد أدم عن تامر حسني مين دا أصلا دا أول ما ظهر كان مطلع شعر صدره؛ أحمد أدم منتقدا تامر حسني أنت مغني ولا ممثل والا ايه بالظبط وكفاية عليك كدة".
وواصل: "أنا بهني أحمد أدم لأنه كسب الرهان في مواجهة المواقع الإخبارية وفيها مواقع رصينة وفي مواجهة السوشيال ميديا اللي بيقول إن الناس فعلا بتمشي ورا الغريب والشاذ والشتايم والخناقات؛ محدش التفت للفيديو اللي بيمدحه فيه".
وأوضح: "الناس هتقرا الشتيمة أحمد أدم نجم كبير وتامر حسني نجم ميجا ستار هتلاقي الخناقة دي والناس تسمع الشتايم أحسن؛ أحنا قدام ورطة حطنا فيها أحمد أدم في برنامجه أدم شو؛ في فكرة هنا عملية ممكن نقول الناس بتعمل تريندات تافهة ونتهم بعض هو عمل فخ ووقع فيه المعظم".
وأكمل: "تحياتنا إلى أحمد أدم على الحركة دي وهارد لك للمواقع اللي وقعت في هذا الفخ؛ وتامر حسني حتى كتب على صفحته "استاذ احمد آدم فعلًا بيدي درس حقيقي بيشرح فيه سمات العصر الحالي اللي كلمة تريند فيه جننت عقول بعض الناس وخليتهم يبيعوا مبادئهم وصداقتهم وامانتهم لمجرد ان الناس تعرفهم..".
واختتم: "تامر بردو نجم كبير وزكي ومخدش المسألة أنه بيجرب فيه لكن للأسف الشديد هي دي حقيقة الموقف والموضوع والتريندات اللي بتشوفوها".
