الجمعة 29 مارس 2024 الموافق 19 رمضان 1445
رئيس التحرير
شيماء جلال
عاجل
أخبار

مصطفى بكري للحكومة: "لازم نرضى الرأي العام.. الناس صابرة بالعافية"

مصطفى بكري
مصطفى بكري

طالب الإعلامي مصطفى بكري؛ الدولة المصرية بالاستماع إلى صوت العاقلين من أبناء الوطن والحديث مع رجال الاستثمار واتخاذ قرارات حاسمة في الملف الاقتصادي.

وقال بكري خلال برنامج "حقائق وأسرار" المذاع على قناة "صدى البلد": "لازم نسمع صوت العاقلين ولازم نجيب رجال الاستثمار ونقعد معاهم وتتخذ قرارات فورية؛ للأسف تتخذ قرارات وتاني القرارات معرفش بيعملوا فيها ايه أو بيعرقلوها ازاي وقبل كدة اتكلمت عن جمهورية صغار الموظفين اللي بيعقدوا أي واحد ليه مصلحة وأي واحد ليه مشكلة وعايز يحلها وعمر دة ما كان لمصلحة الدولة أو النظام".

وأضاف: "احنا عايزين وزارات تحط خطط لقدام؛ عايزين تحموا المواطن ونشوف مشكلة الدولار ازاي نحلها ويبقي في رقابة فعالة على الأسواق؛ والله المواطن المصري مبقاش قادر يعيش بالمرتب بتاعه؛ اللي بياخد 5 ألاف قولولي هيعمل ايه؟ هيدفع الكهرباء أو إيجار البيت أو الماية والا لو هيدفع رسوم والا يأكل عياله".

وتابع: "الناس هتعمل ايه؟ الناس صابرة عشان البلد بالعافية واحنا عشان نضمن سلامة هذا الوطن وحمايته من أي مغرض لازم نواجه جشع التجار بكل قوة ونعمل وزارة اقتصاد تخطط للمستقبل ونجيب وزارة استثمار مهمتها جذب المستثمر".

وواصل: "نجيب الرجالة الشطار الكويسين في المواقع مجبش أي ناس وأحطهم في موقع هنا وهنا فيفسد أي حاجة؛ لما أطلع قانون أطلع قانون يرضي الرأي العام وأما أخد قرار أخد قرار يرضي الرأي العام احنا لينا مين غير الشعب المصري والرأي العام المصري والفلاح الغلبان والعامل الشقيان على المكنة".

وأوضح: "احنا بنتكلم عن المرار اللي جوانا من احساسنا بناسنا وأهلنا؛ هذا الإحساس محتاجينه يتجسد في قرارات؛ زي ما اتاخد قرار في وقف المشروعات ذات المكون الدولاري وأنا قلت الكلام دة في مجلس النواب واحنا بنقول كلام في مصلحة البلد ومصلحة مؤسسات الدولة المصرية".

واختتم: "لازم أما اجيب حد أجيب حد قوي؛ وزير كويس ومحافظ كويس معقولة يا جماعة معقولة ياخوانا محافظة البحيرة ليها عشر شهور بدون محافظ من يوم تولى اللواء هشام أمنة وزارة التنمية المحلية؛ طيب ليه هل هي ندرة؟ هل معندناش لا عندنا؟ هل عنينا مش شايفة الناس الكويسة؟ المفروض تشوف".