"أبو تلاتة".. عمرو أديب يعلق على خسارة الزمالك أمام فاركو

علق الإعلامي عمرو أديب؛ على خسارة فريق الزمالك أمام منافسه فاركو بثلاثية نظيفة في المباراة التي أقيمت بين الفريقين في إطار منافسات بطولة الدوري.

وقال أديب خلال برنامج "الحكاية" المذاع على قناة "أم بي سي مصر": "الزمالك اتغلب من فاركو 3 -0 وماتش كان غريب جدا؛ اللاعبية ملعبتش والمدرب مدربش؛ أي لاعب النهاردة في الزمالك اترقص بسهولة أي لاعيب كان فاركو بيقرب منه بيع".

وأضاف: "مع احترامي لفاركو وشركة فاركو؛ في النهاية ايه اللي بيجرا وأوعي حد يقولي أصل لولا التلات لاعيبة؛ التلات لاعيبة دول مين أنا عندي نصيحة صريحة لنادي الزمالك لا تقيدوا لاعيبة ولا تصرفوا على مدرب الفرقة ضاعت".

وتابع: "الفرقة ضاعت وبقت تنزل تتلطش النهاردة كنا بنلعب قدام فريق عالمي أي لاعيب في الدفاع أو الهجوم كان بيقع قدام فاركو ومعانا مدرب عشان مش عارفين نمشيه ما حنا مشيناه يومين ورجع تاني".

وأكمل: "كل دة بهدلة للزمالك واللي بيجرا هبل وحرام بجد نادي واخد الدولي سنتين ورا بعض أنه يتعمل فيه كدة الماتش غريب والله يكون في عون جمهور الزمالك لأن العند والشد والمشاكل طلعت على الفرقة ومأثر جدا أن الراجل المدرب ولا هنا".

وأوضح: "فاركو بيلعبوا بجروا في الملعب؛ في فرقة الدفاع بتاعها يغلط في التلات أجوال؟ أنت اللي مدى الكورة ليهم وهو خلاص بقي الزمالك أبو تلاتة بيتغلب على طول".

وواصل: "حاجة غريبة وشيء متصدقوش وبعدين واخرتها؛ ولا تصرف فلوس بقي حرام بقي عندنا شيء مش موجود في مصر ولا العالم المدربين مبيدربوش واللاعيبة مبتلعبش".

وخسر الزمالك أمام فاركو بثلاثة أهداف دون رد في المباراة التي أقيمت بين الفريقين مساء اليوم لتكون الخسارة الرابعة للفريق الأبيض في بطولة الدوري.

ويحتل الزمالك المركز الرابع في بطولة الدوري برصيد 29 نقطة بفارق 8 نقاط عن الأهلي متصدر البطولة برصيد 37 نقطة وله مباراتين مؤجلتين.

وكان الزمالك قد أعلن إقالة مدربه البرتغالي جيسوالدو فيريرا وتعيين أسامة نبيه مدربا قبل أن يتراجع ويعيده إلى منصبه مجددا في أقل من أسبوع.