تامر أمين يعلق على أزمة قيد الزمالك: عزبة تدار بواسطة ملاكها
علق الإعلامي تامر أمين؛ على أزمة قيد الصفقات الشتوية لنادي الزمالك في اتحاد الكرة والذي رفض تسجيل اللاعبين الجدد بسبب مديونية النادي المتأخرة.
وقال أمين خلال برنامج "أخر النهار" المذاع على قناة "النهار": "من المعروف أن فترة الانتقالات الشتوية من 1 يناير إلى 31 يناير قام نادي الزمالك سايب الشهر كله وعايز يقيد اللاعبية اقبل غلق الباب بتلت ساعة".
وأضاف: "طيب يازمالك أنت عليك فلوس؛ يقولك معاييش دلوقت عايز أقيد اللاعيبة وقاله هديلك شيك وكمان أسبوع وقالوا لا الكلام دة مينفعش لأن دا مخالف للوائح الاتحاد؛ أنت اية صبرك كل الوقت دة وانت عارف أن القيد يتقفل ولا هو تلكيك عشان تحرج رموز الرياضة شيء منتهي الاستخفاف بالدولة ورموز الدولة".
وتابع: "يطلع رئيس الزمالك المسرحية اليومية على القناة الملاكي أنتوا إيه عايزين تولعوا البلد ويقولك أنا مانع جمهور الزمالك من النزول على أساس أن الجمهور بيحبه أوي؛ المتاجرة السخيفة بالجمهور قال يعني بيحبه أوي كفاية اللعبة اللي حصلت النهاردة تبين أن في تخبط غير مسبوق يعني النهاردة أمشي فيريرا وبعدين يقعد تلات ماتشات وبعدين يرجع".
وأوضح: "استخفاف بعقول الناس وكأنها عزبة تدار بواسطة ملاكها ودة مش صحيح؛ نادي الزمالك كبير وحرام أن ده يبقي حاله وحرام أن دة مجلس الإدارة اللي بيمثله الموضوع زاد عن حدة والموضوع بقي بلطجة وصوت عالي وفرد دراع واهانة لكل الناس".
وواصل: "احنا في الاعلام الشركة المتحدة المحترمة أطلقت حملة اخلاقنا الجميلة ويجي باليل مرتضى منصور يهد أخلاقنا ويولع فيها بجاز ولا حياة لمن تنادي؛ لدرجة الناس بتسأل هل مرتضى منصور دولة جوة الدولة؟ نعرف هل مرتضى منصور فوق القانون نعرف؛ أما وأن ده يحدث بصفة يومية وكلنا نهان ونسب".
وأكمل: "حازم أمام ذنبه ايه يتسب ويتشتم على قناة الزمالك؛ ومين يجيب له حقه؟ أنا عارف النهاردة هطلع على المسرح في قناة الزمالك وهيتقال أن أبويا حرامي وأمي مرتشية".
وذكر: "لأمتي السكوت؟ وصلنا لمرحلة أن في إهانة للدولة المصرية؛ موضوع كلاتينبرج اتشرشحنا عليه وبعدين البرامج في الدول العربية الجزاير والمغرب بتكلم وتقول نشوف المشتمة بتاعة باليل".
واختتم: "الناس بتخاف ترد ليه؟ قالك الدكتور أشرف صبحي كلم اتحاد الكرة وقال إنه الفلوس دي عندي أنا؛ أما الكلام دة محصلش أو الكلام دة حصل ودي تبقى مصيبة أكبر؛ لو حصل هل الفلوس دي عندك كأشرف صبحي الشخص عندك 10 مليون ياريس؟ والا عندك كوزير للشباب والرياضة؟ وفي الحالة دي هتبقي وزير الزمالك؛ المفروض يطلع الوزير يقول كل دة افتراءات وهحاسب كل اللي قال كدة ومش كفاية أطلع بيان صغير من وزارة الرياضة".
