أحمد موسى منفعلا بسبب غياب المنتخب عن كأس العالم: "عيب كفاية مجاملات"

طالب الإعلامي أحمد موسى؛ بضبط منظومة الرياضة في مصر، مشيرا إلى أنه من العيب ألا يتأهل المنتخب الوطني إلى نهائيات كأس العالم المقام حاليا في قطر.

وقال موسى خلال برنامج "على مسؤوليتي" المذاع على قناة "صدى البلد": "بدون ما حد يدايق؛ كلمتين ونص وإحنا بنتابع ماتشات كأس العالم نزعل أكتر وزعلنا يخلينا لازم نتلكم كتير؛ منظومة الرياضة وكان معانا وزير الرياضة أول أمبارح وكنا بنتكلم عن الخطة والخطة مسؤول عنها الدولة مش الاتحاد".

وأضاف: "عندنا كأس العالم اللي جاي 2026 وزي ما قال وزير الشباب والرياضة هذه مسؤولية الاتحاد ووزارة الشباب والرياضة والأندية والجماهير عيب أوي أن إحنا بنتفرج؛ إحنا بنتفرج آه ونشجع المنتخبات العربية والأفريقية ومنتخبات العالم اللي بنحبها؛ أنا كنت بشجع البرازيل وألمانيا ولكن دلوقت مبشجعش ألمانيا وعايزهم يخرجوا شجع منتخبات عندها احترافية".

وتابع: "اليوم حان الوقت الأولوية لمنتخب مصر؛ أهلي وزمالك وسموحة ومقاولين ومصري كله على دماغي لكل قبل كل دول منتخب مصر؛ علينا التركيز أن منتخبنا لأنه لما يكون عندك الفرق بتاعتنا قوية ميبقاش عندك مجاملات؛ كفي عهد المجاملات لازم الحياد في كرة القدم ولازم يبقي عندنا تحكيم على أعلى مستوى".

وواصل: "الفار النهاردة مبيجاملش حد وميعرفش حد النهاردة التحكيم اللي بنشوفه في كأس العالم لازم الحكم المصري يشوف التحكيم العالمي بيحصل ايه؛ الأخطاء نادرة والانذارات زي مانت شايف امبارح ست سبعة إنذارات في ماتش واحد يطرد مدير فني لأنه اعترض على الحكم".

وأكمل: "هي دي عدالة التحكيم وعدالة كرة القدم لازم نطبق هذا الامر في الماتشات بتاعتنا دوري أو كاس؛ عندي النهاردة عدد من اللاعيبة المحترفة والأولوية النهاردة ارفعوا اسم منتخب مصر ياجماعة مينفعش أبدا النهاردة بحجم مصر وتاريخ مصر وحضارة مصر ميبقاش منتخبنا في كأس العالم 2022 في قطر والله اللي بشوفه النهاردة وحزني وأنا بتفرج على الماتشات".

وأوضح: "بشجع المنتخب السعودي والتونسي والمغربي بمنتهي الروح الرياضة لأنهم في الأخر بيمثلونا؛ شوفوا المكاسب من تواجد المنتخبات في المونديال حجم الفلوس والاعلانات والدعاية ومليارات بيفرجوا على منتخب بلدك وحد أدنى ماتش 3 مليار".

واختتم: "شوف احنا في 2018 في روسيا كنا ايه وعملنا ايه؛ اتركوا مجال كرة القدم لكرة القدم في الاخر أنا عايز منتج أنا عايز منتخب قوي النهاردة سويسرا محاصرة البرازيل لحد ما سجلوا الجول؛ المنتخبات رايحة تلعب كورة وعندها لاعيبة واقفة على رجليها".