تامر أمين يعلق على فوز الأهلي الأول ببطولة الدوري: فوقنا كلنا

علق الإعلامي تامر أمين؛ على فوز الأهلي على منافسه الإسماعيلي بهدف دون رد في افتتاحية مباريات الفريقين بالدوري الممتاز لكرة القدم.

وقال أمين خلال برنامج "أخر النهار" المذاع على قناة "النهار": "النهاردة الأهلي فوقنا كلنا؛ النهاردة كانت ضربة البداية للنادي الأهلي في الموسم الجديد في المباراة التي انتهت منذ قليل واللي فاز فيها الأهلي بهدف الأهلاوي اللي لايق عليه التشيرت شادي حسين أول مباراة رسمية مع النادي الأهلي وأول انتصار للأهلي كل الكلام ده حلو لكن الأحلى منه مارسيل كولر المدير الفني للنادي الأهلي".

وأضاف: "كولر اثبتلي النهاردة أنه مدرب تقيل ومع ذلك أنا لسة حكمي مبكر؛ أنا ابتديت اتفائل والنهاردة هقدر أقول ابتديت أبقى متفائل الأكيد اللي أنا شفته النهاردة من إدارة كولر للأهلي تطمئني إلى حد بعيد".

وتابع: "أولا تشكيل يميل إلى الثبات وعنده هدوء بيعجبني جدا؛ مش نايم على الخط ولا متنشن الفرقة وبيدير الأمور ببساطة ودي سمة المدير الفني الواثق من نفسه من لاعبيه".

وواصل: "ثم بقي كارت الجوكر اللي خلاني أقول الراجل دة عنده حاجة كويسة؛ تغييرة كريم فؤاد؛ الأهلي كان متعادل لحد الدقيقة 60-65 وكلنا قلنا هينزل شادي حسين ودة اللي عمله وقلنا هينزل حسين الشحات بدل طاهر أو قفشة مكان برونو سافيو؛ راح شايل عبد القادر ونزل كريم فؤاد".

وأوضح: "كل الناس قالت أيه ده مين ده انت بتعمل ايه لحد ما فوجئنا أن كريم فؤاد قلب الماتش؛ اختراقات ونفس كبير وخلي أكرم توفيق يثبت كباك يمين وكريم فؤاد سحل الجبهة اليسري للإسماعيلي رايح جاي والكلام دة بيقول أن الراجل دة بيفهم وعنده تفكير مش بيسمع كلام وخلاص وفي النهاية واضح أن عنده دماغ وعنده فكر 

وأكمل: "مكسب للأهلي وجود كولر ومكسب مهم أنك تبدأ الدوري بانتصار ولما يكون الانتصار على واحد من قمم الكرة المصرية وهو الإسماعيلي؛ مكسب مهم جدا يديك انطلاقة".

وحقق النادي الأهلي فوزه الأول بالدوري تحقيق قيادة مدربه السويسري مارسيل كولر ليحقق أول ثلاثة نقاط في مشوار استعادة اللقب الغائب منذ سنتين.