مصطفى بكري: "الناس مبتحطش الدولار في البنك خوفا من مصير لبنان"
أكد الإعلامي مصطفى بكري؛ أن ارتفاع الدولار والذهب يدفع الناس إلى فقدان الثقة في كل شيء، مشيرا إلى أن حائزي الدولار يتخوفون من إيداعه في البنك.
وقال بكري خلال برنامج "حقائق وأسرار" المذاع على قناة "صدى البلد": "لما الدولار يرفع هذا الارتفاع الجنوني ولما الدهب يوصل إلى 4100 جنيه دا بيخلي الناس تفقد ثقتها في كل حاجة؛ ولما بقول للناس أنتوا مبتحطوش دولارات في البنوك ليه؟ يقولك ما انا هكسب كذا وكذا وأيه ضمني متبقوش زي لبنان ومعرفش اخد فلوسي؟".
وأضاف: "واحنا بنقول هذا الكلام بنعترف بالازمة وتداعيات الأزمة وبعض اللي تسببوا في زيادة الحنق ومزيد من الازمة والخنقة؛ طيب ايه العمل؟ هل مطلوب الشعب المصري يفضل يتلقى مصيره كدة لغاية ميلاقيش لقمة العيش؟
وتابع: "أنا عايز أوصل لنتيجة سلبا أو إيجابا؛ أنا لسه بروح بلدنا في قنا وسط الناس الغلابة واقف وسطهم وشايف أهلي وناس وبلدي بتعبر عن مصر كلها وأنا بقول اللي جوايا اللي يقبل كلامي يقبله واللي ميقبلش هو حر؛ انا حذرت في زمن مبارك وحذرت في مجلس النواب وقلت لازم نوقف المشروعات القومية لفترة معينة لأن في أولويات".
وواصل: "احنا أبناء البلد دي وخايفين على مصر وعلى القيادة السياسية وعلى الراجل اللي وقف معانا وأنقذنا ولكن البرتيتا؟ فلتذهب البرتيتا وأي حد ولكن البلد دي تبقى؛ الراجل الكويس اللي بيأدي كويس أهلا وسهلا واللي مبيأديش النظام لازم يخلص منه احنا مش هنفضل نشيل أعباء على دماغنا".
وأكمل: "خلينا نقول أولا أن الأزمة نتيجة تداعيات عديدة واخطاء وحرب اقتصادية ممنهجة؛ في حرب على كافة الاتجاهات؛ عمركم شوفتوا بلد متحاصرة زي مصر في التاريخ الحديث؟ مين اللي بيدير الأزمة دي وماشي بحكمة وموضوعية وعينة على البلد ومين اللي سلح الجيش المصري وبقي قوة كبيرة".
وأوضح: "اللي عمل ده رئيس بدرجة مواطن اسمه عبد الفتاح السيسي؛ طيب الناس اللي محاصرانا دي محاصرانا ليه؟ عشان نقع ماشي؛ أمتي يحافظوا علينا لما نصبح زي الخاتم في ايدهم؛ أعمل يا سيسي كذا هعمل انزل خش معانا في البحر الأحمر وابعت اسطولك هوافق أقف مع الأمريكان في الخندق هوافق".
واختتم: "هنديك 200 مليار دولار تدفع الـ 164 مليار اللي عليك وتاخد في أيدك كاش 32 مليار دولار بس بشرط تفتح حدود سيناء وتاخد اخوانك الفلسطينيين وتعملهم دويلة ودي الرسالة اللي بلغتها إسرائيل لكل دول العالم".
