تامر أمين يعلق على خلافات شاكوش وزوجته: "كل إناء ينضح بما فيه"

علق الإعلامي تامر أمين؛ على الخلاف بين مطرب المهرجانات حسن شاكوش وزوجته والذي اندلع مؤخرا بعد أن اتهمته بطردها والاستيلاء على حقوقها.

وقال أمين خلال برنامج "أخر النهار" المذاع على قناة "النهار": "القصة مش عجباني من البداية من أول الفرح؛ الفيلم دة مش عاجبني من البداية الفرح كان مبالغ فيه أوي والشكل اللي اتعمل كان مبالغ فيه أوي والافعال اللي اتعملت في الفرح والحركات اللي اتعملت من أجل التريند في الفرح أنا ضدها تماما".

وأضاف: "فرح الانسان دة ليلة العمر والعريس والعروسة المفروض انهم ينسوا كل حاجة ويبدأوا مستقبل مع شريك الحياة مش أني أفكر في التريد والشكل وأفكر في البدلة اللي بيطلع لك من كل حتة وأن مين يسجد عشان يعمل ايه".

وتابع: "ما بعد الفرح كل الحاجات اللي شوفناها دي أنا متحفظ عليها بشكل كبير جدا؛ سواء ظهورهم في البرامج والكلام اللي قالوه أو طريقة الانفصال بكل الهجوم المتبادل والتفاصيل الغير لائقة اللي اتقالت؛ أنا ضد الفكرة من الأول للاخر؛ أنا هرجع وأقولك إن لكل مقام مقال؛ وبيتقال إن كل إناء ينضح بما فيه".

وبدأت بوادر الأزمة بين حسن شاكوش وزوجته ريم طارق، منذ شهر رمضان 2023، بعد نشوب خلافات بينهما، واستمرت مفاوضات الصلح بينهما لعدة أيام دون جدوى. 

وقبل أسبوع قررت ريم طارق، الانفصال عن حسن شاكوش، واللجوء للقانون، وقامت بإلغاء متابعته عبر حسابها الخاص على تطبيق الصور إنستجرام. 

وبعد شهر من زواجهما وحفل زفافهما الأسطوري، حررت زوجة مطرب المهرجانات حسن شاكوش محضرا ضده بقسم شرطة أكتوبر أول تتهمه فيه بسرقة منقولات الزوجية والاستيلاء على إيصال أمانة. 

وتلقى اللواء محمد الشرقاوى، مدير الإدارة العامة للمباحث، إخطارا من العقيد عمرو حجازى، مفتش المباحث، يفيد فيه بحضور ريم صادق -28 سنة - ربة منزل ومقيمة داخل كمبوند شهير، إلى القسم لتضررها من زوجها حسن منصور وشهرته (حسن شاكوش ) لقيامه بطردها من منزل الزوجية منذ أيام والاستيلاء على المنقولات الزوجية وشبكتها وإيصال أمانة لصالحها بديل مؤخر الصداق.

وفي المقابل اتهم مطرب المهرجانات حسن شاكوش زوجته بالاستيلاء على مبالغ مالية من بيت الزوجية بالإضافة إلى إخفاء كونها متزوجة قبل الزواج منه.